Kaspııde QR shekarashylary eskertýge qulaq aspaǵan Daǵystan brakonerine oq atty
ASTANA. QazAqparat - Búgin Kaspıı teńiziniń akvatorııinde kezekshilik júrgizý kezinde shekara qyzmeti teńizdegi QR aýmaǵynda (Baýtıno kemejaıynan on shaqyrym jerde) belgisiz úsh adam otyrǵan brakonerlik qaıyqty anyqtady.
Quqyq buzýshylar júzý quralyn toqtatý talaptaryna qulaq aspaǵan, oǵan qosa, RF akvatorııine qaraı ótip ketpek bolǵan.
Shekarashylar olardy qýyp, toqtatý maqsatynda eskertý retinde áýege birneshe ret oq atady. Alaıda, nátıje bolmaǵan soń eskertýden soń keme qozǵaltqyshtaryna oq atty, dep habarlaıdy QR UQK ShQ-niń baspasóz qyzmetinen. Qarý qoldanǵan soń eki qozǵaltqysh isten shyǵyp, quqyq buzýshylardyń biri, ózderiniń aıtýynsha, Reseı Federatsııasy Daǵystan Respýblıkasynyń azamaty jaralanǵan. Jaralanǵan er adam Aqtaý qalasynyń oblystyq aýrýhanasyna jetkizilip, medıtsınalyq kómek kórsetildi. Qazirgi ýaqytta onyń jaǵdaıy qanaǵattanarlyq. Toqtatylǵan kemeniń ishinde bekire balyqtaryn ustaýǵa arnalǵan 12 qapqa salynǵan brakonerlik aý, janar-jaǵarmaı quıylǵan 4 bóshke jáne úsh uıaly telefon anyqtaldy. Atalǵan fakti boıynsha QR QK-niń 392-babynyń 1-bólimimen («Qazaqstan Respýblıkasynyń Memlekettik shekarasyn qasaqana zańsyz buzý») tirkelgen tekserý júrgizilip jatyr.
