Kaspııde qyrylǵan ıtbalyq sany myńǵa jýyqtady
AQTAÝ. KAZINFORM – Mańǵystaýdaǵy Kaspıı teńiziniń jaǵalaýynda ólgen ıtbalyqtar sany artýda.
Mańǵystaý oblystyq balyq sharýashylyǵy ınspektsııasy basshysynyń mindetin atqarýshy Andreı Rýtskııdiń aıtýynsha, kesheden beri Aqtaýdaǵy demalys bazalarynan bastap Quryq portyna deıingi aralyqtan taǵy 115 ıtbalyqtyń óleksesi jınalǵan. Sonymen qyrylǵan ıtbalyqtardyń sany - 850-ge jetti.
-Bizdiń ınspektorlar, ekologtar, ákimdik qyzmetkerleri men qoǵamdyq birlestik ókilderinen qurylǵan jumys toby jaǵalaýdy tekserýde. Endi taý-tasty jaǵajaılar qaldy. Olarǵa kólikpen barý múmkin emes, jaıaý aralaıdy, - deıdi ınspektsııa basshysy.
Andreı Rýtskııdiń maıtýynsha, sońǵy tabylǵan teńiz sútqorektilerinen synama alý múmkin emes. Mamandar ıtbalyqtardyń úshinshi, tórtinshi satyda buzylyp ketkenin aıtqan. Al ótken aıdyń sońynda alynǵan synamalardyń qorytyndysy áli shyqpaǵan.
Buǵan deıin Kaspıı jaǵalaýynan tabylǵan ıtbalyq ólekseleriniń sany 533-ke jetkeni týraly habarladyq. Sonymen qatar ıhtıolog Ásel Baımuqanova ıtbalyqtardyń teńizdiń soltústik aýmaǵyna mıgratsııasy kezinde qyrylǵanyn aıtqan bolatyn.