Kaspııde Qazaqstannyń áskerı kemeleriniń sherýi ótti

AQTAÝ. QazAqparat – Aqtaý qalasynda Qazaqstan Qarýly kúshteri Áskerı-teńiz kúshteriniń 30 jyldyǵyna oraı kemeler men eseptoptardyń saltanatty sherýi ótti. QazAqparat bul týraly Qorǵanys mınıstrliginiń saıtyna silteme jasap habarlaıdy.

Paradty Qorǵanys mınıstriniń birinshi orynbasary general-leıtenant Marat Qusaıynov, Mańǵystaý oblysynyń ákimi Nurlan Noǵaev, Qarýly kúshterdiń ardagerleri baqylady.

Saltanatty sherýge «Qazaqstan», «Oral», «Saryarqa», «Mańǵystaý» zymyrandy-artıllerııalyq kemeleri, «Alataý» mına-tartqysh kemesi, «Tabıǵat» jáne «Jaıyq» gıdrografııalyq kemeleri qatysty. Keıin jaǵalaý boıymen sap túzep ótken teńizshiler kemeler artıllerııasy qarýlarynan birneshe dúrkin oq atty.

Sherý qalanyń jaǵalaý aımaǵynda – qurlyqta jalǵasty. Áskerı orkestrdiń súıemeldeýimen Aqtaý garnızonynyń áskerı bólimderiniń eseptoptary saltanatty marshpen júrip ótip, mereke kórkin qyzdyra tústi.

Budan bólek, shartty qarsylasty ustaý boıynsha áskerı-jattyǵý barysynan epızod kórsetildi.

Sondaı-aq dástúr boıynsha áskerı qyzmetshiler mańǵystaýlyq jaýyngerlerdi eske alý sharasyn ótkizdi. Máńgilik alaýǵa gúl shoqtaryn qoıý rásimine Keńes Odaǵynyń Batyry, Halyq Qaharmany ǵaryshker avıatsııa general-maıory Toqtar Áýbákirov, kontr-admıral Ratmır Komratov, Qarýly kúshterdiń ardagerleri qatysty.

Shara sońy Qazaqstan Áskerı-teńiz kúshteriniń 30 jyldyq mereıtoıyna arnalǵan merekelik otshashýmen aıaqtaldy.