Kaspııde Qazaqstan men Ázerbaıjannyń áskerı teńiz kúshteri jattyǵyp jatyr
AQTAÝ. KAZINFORM — «Kaspıı samaly — 2025» jattyǵýy Kaspıı teńiziniń qazaqstandyq sektorynda ótip jatyr. Oǵan eki elden 300-ge jýyq áskerı qyzmetshi qatysyp jatyr.
Jaýyngerler radıobaılanys jattyǵýlarymen qatar, birlesken manevrlar jasap, izdestirý-qutqarý jumystaryn pysyqtady. Sonymen qatar, sýasty-dıversııa, katerler men áýe shabýylyna qarsy qorǵanys baǵytynda birqatar tapsyrma oryndady.
QR Qarýly kúshteri Áskerı-teńiz kúshteri bas qolbasshysynyń birinshi orynbasary, bas shtab bastyǵy birinshi rang kapıtany Qanat Nııazbekovtiń aıtýynsha, Kaspıı teńizindegi qaýipsizdikti qamtamasyz etýde birlesken jattyǵýlardyń mańyzy zor.
— Jattyǵý aıasynda ózara is-qımyldy kúsheıtý, áskerı-teńiz kúshteri arasyndaǵy baılanys pen úılesimdilikti nyǵaıtý, jeke quramnyń kásibı sheberligin arttyrý syndy mindetter qamtyldy. Eki eldiń áskerı-teńiz kúshteri tájirıbe almasyp, jalpy jattyǵý kezinde 8 epızod boıynsha daıarlyǵyn shyńdady. Osylaısha halyqaralyq yntymaqtastyqty nyǵaıtyp jatyrmyz, — deıdi bas shtab bastyǵy Qanat Nııazbekov.
Áskerı teńizshiler sýdaǵy jáne áýedegi nysanalarǵa dáldep oq atyp, sý betinde júzip júrgen mınalardy joıý operatsııasyn da sátti ótkizdi.
Qazaqstan tarapynan jattyǵýǵa «Oral», «Saryarqa», «Mańǵystaý» zymyran-artıllerııalyq kemeleri, jaýyngerlik katerler, gıdrografııalyq kemeler men avıatsııa qatysyp jatyr. Al, Ázerbaıjan áskerı-teńiz kúshteri «G-122», «G-124» kúzet kemeleri men «G-129» kómekshi kemesin jumyldyrdy.
Buǵan deıin, Aqtaýlyq súńgýirdiń teńiz túbin qoqystan tazalaǵany týraly jazǵan bolatynbyz.