Kaspııde qaza bolǵan áskerı qyzmetshilerdiń sany 12-ge jetti, ekeýi izdestirilip jatyr
ASTANA. KAZINFORM — Qanat Bozymbaev áli tabylmaǵan áskerı qyzmetshilerdi úzdiksiz izdestirýdi tapsyrdy, dep habarlaıdy oblys ákimdiginiń baspasóz qyzmeti.
Vedomstvo málim etkendeı, QR Premer-mınıstriniń orynbasary Qanat Bozymbaev bastaǵan Úkimettik komıssııa Mańǵystaý oblysyndaǵy tótenshe jaǵdaı bolǵan jerde jumysyn jalǵastyryp jatyr. Oqıǵa ornynda jumyldyrylǵan memlekettik organdardyń is-qımyly jáne izdestirý-qutqarý jumystary úılestirilýde. Qazirgi tańda negizgi mindet — ornalasqan jeri anyqtalmaǵan eki áskerı qyzmetshini izdestirý.
— Naqtylanǵan málimetke sáıkes, oqý-jattyǵý-jaýyngerlik tapsyrmany oryndaý kezinde aýa raıynyń kúrt nasharlap, jeldiń kúsheıýine baılanysty 17 adam sýǵa ketken. Onyń 12-si qaza taýyp, úsh áskerı qyzmetshi qutqaryldy. Qalǵan eki áskerı qyzmetshini izdestirý jumystary jalǵasýda, — delingen habarlamada.
Qanat Bozymbaev áli tabylmaǵan áskerı qyzmetshilerdi qajetti barlyq kúshter men quraldardy tarta otyryp, táýlik boıy úzdiksiz izdestirýdi qamtamasyz etýdi tapsyrdy. Sondaı-aq qaza tapqan áskerı qyzmetshilerdiń otbasylaryna qajetti materıaldyq jáne ózge de kómek kórsetý tapsyryldy.
Ýákiletti organdar oqıǵanyń barlyq mán-jaıyn anyqtaý boıynsha jumys júrgizip jatyr. Komıssııanyń jumysy men oqıǵa ornyndaǵy izdestirý-qutqarý is-sharalary jalǵasýda.
Eske salaıyq, 2026 jylǵy 24 qyrkúıekte Kaspııdegi áskerı oqý-jattyǵý kezinde 9 áskerı qyzmetshi qaza tapqanyn habarlaǵanbyz. Úsh áskerı qyzmetshi qutqaryldy. Olardyń bireýi aýrýhanaǵa jatqyzyldy. Qalǵandaryn izdeý jumystary jalǵasyp jatyr.
Keıinirek áskerı qyzmetshilerdiń qaza bolý faktisi boıynsha qylmystyq is qozǵalyp, tergelip jatqanyn jazdyq.
Mańǵystaý oblysynda áskerı qyzmetshilerdiń qaza bolý sebepterin tergep-tekserý jónindegi úkimettik komıssııa quryldy.
Komıssııa quramyna qorǵanys mınıstri, Mańǵystaý oblysynyń ákimi, Eńbek jáne halyqty áleýmettik qorǵaý, Tótenshe jaǵdaılar, Densaýlyq saqtaý, Kólik mınıstrlikteriniń basshylyǵy, Bas áskerı prokýror, sondaı-aq shekara qyzmetiniń ókilderi kirdi.
Sonymen qatar, Prezıdent Qasym-Jomart Toqaev Mańǵystaý oblysynda áskerı oqý-jattyǵý kezindegi qaıǵyly oqıǵa saldarynan qaza tapqan áskerı qyzmetshilerdiń týǵan-týystaryna kóńil aıtty.
Áskerılerdiń qazasynan keıin Aqtaýda úsh kúnge josparlanǵan merekelik sharalar ótpeıtin boldy.
25 qyrkúıek Qazaqstanda jalpyulttyq aza tutý kúni bolatyny belgili boldy.
