Kaspııde qatynaıtyn krýız laıneri qandaı porttarǵa toqtaıdy
ASTANA. KAZINFORM — 2025 jyldyń aqpan-naýryz aılarynda Kaspııde krýız laıneri tolyqqandy júre bastaıdy. Bul týraly Týrızm jáne sport mınıstrliginen málim etti.
«Óńirdiń týrıstik áleýetin damytýǵa reseılik „Vladımır Jırınovskıı“ (2024 jyldyń basynda ataýy ózgertilgen, buryn „Uly Petr“ dep atalǵan) krýız laıneriniń paıdalanýǵa berilýi oń áser etedi. Astrahan oblysy mádenıet jáne týrızm mınıstrliginiń aqparaty boıynsha „Lotos“ Astrahan keme jasaý zaýytynda jasalyp jatqan laıner 2024 jyldyń sońyna deıin (qarasha-jeltoqsan) tolyǵymen tapsyrylyp, qoldanysqa berilýi kerek. Laıner „Sýdaǵy bes juldyzdy qonaq úı“ tujyrymdamasyna sáıkes keledi. Paıdalanýǵa berý aktisin 2025 jyldyń basynda alamyz», — dep atap ótti mınıstrlikten agenttiktiń resmı saýalyna oraı.
Vedomstvo málimetinshe, 2025 jyldyń aqpan-naýryz aılarynda laıner Kaspııde tolyqqandy júre bastaıdy.
«Laınerdiń boljamdy kirý porttary: Astrahan (Reseı), Aqtaý (Qazaqstan), Túrikmenbashy (Túrikmenstan), Amırabad, Noýshehr, Enzelı porty (Iran Islam Respýblıkasy), Baký (Ázerbaıjan Respýblıkasy), Mahachkala (Reseı). Jalpy, laınerdi paıdalaný aıasynda „Aqtaý teńiz saýda porty“ UK» AQ jelisi boıynsha tıisti daıyndyq jumystary júrgizilip jatyr. Laıner elimizge keletin týrıster aǵynyn arttyrýǵa jáne týrızm salasynda qyzmet kórsetetin jergilikti kompanııalardyń odan ári damýyna oń áserin tıgizedi», — dedi mınıstrlikten.
