Kaspııde ǵana kezdesetin ıtbalyq týraly ne bilemiz
ASTANA. KAZINFORM — Kaspıı teńizinde tabıǵattyń naǵyz ǵajaıyptarynyń biri — Kaspıı ıtbalyǵy mekendeıdi, dep habarlaıdy Ekologııa jáne tabıǵı resýrstar mınıstrliginiń baspasóz qyzmeti.
Vedomstvo atap ótkendeı, onyń basty ereksheligi — Jer sharynda tek Kaspıı teńizinde ǵana kezdesýi, ıaǵnı bul janýardy tabıǵı ortada álemniń basqa eshbir jerinen kóre almaısyz.
Kaspıı ıtbalyǵy ómiriniń basym bóligin sýda ótkizedi. Qorek izdep uzaq qashyqtyqtardy júzip ótedi. Al qysta Kaspııdiń soltústik bóligindegi muzdy alqaptar erekshe mańyzǵa ıe — analyqtary muz ústinde kúshikteıdi.
Alaıda Kaspııdiń osy biregeı turǵyny erekshe qorǵaýdy qajet etedi. Teńizdiń lastanýy, balyq aýlaý quraldaryna kezdeısoq túsýi, meken etý ortasynyń ózgerýi jáne basqa da faktorlar onyń popýlıatsııasyna áser etedi.
— Qazaqstanda Kaspıı ıtbalyǵy Qyzyl kitapqa engizilgen jáne memleket qorǵaýynda. Túrdiń jaǵdaıyn zertteý, sanyn esepke alý jáne meken etý ortasyn saqtaý baǵytynda ǵylymı monıtorıng júrgiziledi. Kaspıı ıtbalyǵyn qorǵaý — bir ǵana janýardy qorǵaý emes. Bul Kaspıı teńiziniń tutas ekojúıesin jáne álemde balamasy joq tabıǵı muramyzdy saqtaý, — deıdi mamandar.
Osyǵan deıin balyq sharýashylyǵy komıtetiniń tóraǵasy Serik Sermaǵambetov Kaspıı teńiziniń barlyq aýmaǵynda ıtbalyqtar qyrylyp jatqanyn aıtty.
