Kaspııde eki áskerı qyzmetshini izdeý operatsııasyna júzdegen adam jumyldyryldy
ASTANA. KAZINFORM — Premer-Mınıstrdiń orynbasary Qanat Bozymbaevtyń tóraǵalyǵymen áskerı qyzmetshilerdiń qaza bolýyna baılanysty qurylǵan Úkimettik komıssııanyń tapsyrmasyna saı, oqý-jaýyngerlik tapsyrmany oryndaý kezinde sýǵa ketken eki áskerı qyzmetshini izdestirý-qutqarý operatsııasy áli jalǵasyp jatyr. Bul týraly Qorǵanys mınıstrligi málim etti.
Іzdestirý-qutqarý jumystaryna oqıǵa ornynda tikeleı basshylyqty Qorǵanys mınıstri avıatsııa general-leıtenanty Dáýren Qosanov júzege asyrýda. Qurylǵan jedel shtabtyń quramyna Qorǵanys mınıstrliginiń, UQK Shekara qyzmetiniń, Tótenshe jaǵdaılar mınıstrliginiń, Іshki ister mınıstrliginiń, sondaı-aq Mańǵystaý oblysynyń jergilikti atqarýshy organdarynyń ókilderi kirdi.
Vedomstvonyń málimetinshe, aýqymdy izdestirý-qutqarý operatsııasyna 252 áskerı qyzmetshi men qyzmetker, 34 birlik arnaıy jerústi tehnıkasy, 37 áskerı súńgýir, 14 keme men kater, sondaı-aq 4 tikushaqty qosa alǵanda, 20-dan astam áýe kemesi jumyldyryldy. Vedomstvolardyń kúshteri men quraldarymen sý aıdyny, jaǵalaý aımaǵy jáne oǵan irgeles aýmaqtar áýeden úzdiksiz baqylanyp, tekserilip jatyr.
Oqıǵa faktisi boıynsha qylmystyq is qozǵaldy. Arnaıy komıssııa oqıǵanyń barlyq sebepteri men mán-jaılaryn anyqtaý maqsatynda tergeý is-sharalaryn júrgizýde. Qaza bolǵandardyń otbasylaryna jáne zardap shekken áskerı qyzmetshilerge qajetti materıaldyq jáne psıhologııalyq kómek kórsetiledi.
Eske salaıyq, 2026 jylǵy 24 qyrkúıekte Kaspııdegi áskerı oqý-jattyǵý kezinde 9 áskerı qyzmetshi qaza tapqanyn habarlaǵanbyz. Úsh áskerı qyzmetshi qutqaryldy. Olardyń bireýi aýrýhanaǵa jatqyzyldy.
Keıinnen Kaspııde qaza bolǵan áskerı qyzmetshilerdiń sany 12-ge jetip, ekeýi izdestirilip jatqany habarlandy.
Qorǵanys mınıstrligi oqý-jattyǵý kezinde qaza tapqan áskerı qyzmetshilerdiń tizimin jarııalady.
Áskerı qyzmetshilerdiń qaza bolý faktisi boıynsha qylmystyq is qozǵalyp, tergelip jatqanyn jazdyq.
Sonymen qatar, Prezıdent Qasym-Jomart Toqaev Mańǵystaý oblysynda áskerı oqý-jattyǵý kezindegi qaıǵyly oqıǵa saldarynan qaza tapqan áskerı qyzmetshilerdiń týǵan-týystaryna kóńil aıtty.
Áskerılerdiń qazasynan keıin Aqtaýda úsh kúnge josparlanǵan merekelik sharalar ótpeıtini aıtyldy.
Halyq Keńesi músheleri qaza tapqan áskerılerdiń otbasylaryna 815 mln teńge bóletini habarlandy.
