Kaspııde brakonerlermen kúresti jedel toptar júrgizedi
ATYRAÝ. QazAqparat - Kaspııdegi brakonerlermen kúresti prokýratýranyń bastamasymen balyq aýlaý maýsymy kezinde qurylǵan utqyr top júrgizetin boldy, dep habarlaıdy «QazAqparat» HAA tilshisi.
«Oblystyń tabıǵatty qorǵaý prokýratýrasy, balyq ınspektsııasy, «Aqjaıyq» memlekettik tabıǵı rezervaty, oblystyq ІІD, shekara áskerı bólimshesi birigip teńizge shyǵýǵa yńǵaıly bógetterdi bekitti. Bul is óz nátıjesin berdi. Búgingi tańda jedel toptar balyqty qorǵaý zańnamalarynyń 339 ret buzylǵanyn anyqtap, 16 qylmystyq quqyqbuzýshylyq sotqa deıingi tergeýdiń biryńǵaı tizilimine tirkeldi, chastık tuqymdas balyqtardyń 6455 kelisi, bekire tuqymdastarynyń 1254,8 kelisi, bekire balyqtary ýyldyryǵynyń 6 kelisi, 1325 aýlaý jabdyqtary, 68 júzý jáne kólik quraldary tárkilendi. Sý qoımalaryn torýyldaý barysynda 237 zańsyz balyq aýlaý quraldary, 16 qoldan jasalǵan júzý quraldary tabyldy», - dep habarlady oblys prokýrory Ernat Sybanqulov.
Ótken jyldarda quqyqbuzýshylyqtar Isataı aýdanynyń Janbaı aýyly mańynda jıi anyqtalǵan. Ondaǵy quqyqtyq tártipti nebary eki polıtsııa qyzmetkeri júzege asyryp kelgen. Bıyl oblystyq ІІD prokýratýrasynyń bastamasymen aýyldaǵy tártipke baqylaý kúsheıtilip, 13 ýchaskelik ınspektory jáne tıisti tehnıkalary bar aýyldyq polıtsııa bólimshesi quryldy.
