Kaspııde bekire aýlaǵan brakonerler ustaldy

ASTANA. 28 qazan. QazAqparat - Qazaqstan shekarashylary Kaspıı teńizinde 2 «baıda» (jasandy júzý quraly) minip, zańsyz balyq aýlap júrgen 8 brakonerdi ustady, dep habarlaıdy QR UQK ShQ baspasóz qyzmetinen.

Ótken demalys kúnderi Kaspıı teńizindegi qazaqstandyq shekara bóligin qorǵap júrgen shekarashylar, atap aıtqanda, QR UQK Shekara qyzmetiniń «Jaǵalaý kúzeti» óńirlik basqarmasynyń «Mı-8» tikushaǵynyń ekıpajy shekarany buzyp teńizde jaıbaraqat balyq aýlap júrgen 2 shaǵyn júzý quralyn baıqady.

Shekarashylardyń daýys kúsheıtkish arqyly bergen toqtaý týraly talabyn brakonerler estimegen syńaı tanytyp, kerisinshe jyldamdyǵyn arttyryp, Qazaqstan shekarasynan shyǵyp ketýge asyqty.

Bir emes úsh motormen jasaqtalǵan «baıdany» qýalaý kezinde shekarashylardyń qarý qoldanyp, eskertý oǵyn atýyna týra keldi. «Baıdadaǵy» batyrlar buǵan da nazar aýdarmastan, jyldamdyǵyn odan ary arttyra tústi.

Osydan keıin tikushaq ekıpajy «baıdanyń» motoryna oq atyp, olardy amalsyzdan toqtaýǵa májbúr etti. Osy sátte «baıda» mingen batyrlar ózderine kómek kerek ekendigin bildirip, belgi bere bastady. Keıinnen anyqtalǵanyndaı, shekara buzýshylardyń bireýi oń jaq aıaǵynan jaralanypty. Jaralanǵan adamdy tikushaq ekıpajy «lebedka» arqyly kóterip, ony tez arada Aqtaý qalasynyń oblystyq aýrýhanasyna jetkizdi.

Qazirgi ýaqytta jaralanǵan adamnyń densaýlyǵy jaqsy, onyń ómirine eshqandaı qaýip tónip turǵan joq.

Osydan shamaly ýaqyt ótkennnen keıin úsh jolaýshysy bar taǵy bir «baıda» ustaldy.

Oqıǵa bolǵan aımaqqa shekara katerleri jiberildi. Daǵystandyq shekara buzýshylardyń barlyǵy ustalyp, Baýtın portyna jetkizildi. Olardan 2000 metr bolatyn balyqshy aýy men 78 dana bekire balyǵy alyndy.

Atalǵan derek boıynsha qylmystyq is qozǵalyp, shekara buzýshylar tergeý ızolıatoryna qamaldy.

Sondaı-aq, Qazaqstan Respýblıkasynyń shekarasyn buzǵan taǵy bir adam ustaldy, ıaǵnı shekara zastavasynan 10 shaqyrymdaı qashyqtyqtaǵy Maslınskıı dep atalatyn túbek mańaıynda 32 jastaǵy otandasymyz er azamat «Ýral» mototsıklimen brakonerlik oljasyn alyp ketýge tyrysty. Tekserý kezinde, onyń kóliginen 215 metr bolatyn kaprondy aý quraly, 11 dana bekire, 8 dana sazan balyǵy alyndy. Ustalǵan azamattyń kóliginiń qujattary men shekaralyq ruqsattamasy bolmaı shyqty.

Atalǵan derekter boıynsha tergeý jumystary júrgizilýde.