Kaspııde balyq ósirile bastady: Mańǵystaýda alǵashqy ónim qyrkúıekte alynady
ASTANA. KAZINFORM — Mańǵystaý oblysynda Kaspıı teńiziniń tereń sýly bóliginde torly ádispen balyq ósirý jobasy alǵashqy óndiristik kezeńge shyqty. «Organic Fish» kompanııasy bıyl qyrkúıekte alǵashqy 150 tonna taýarlyq balyq alýdy josparlap otyr. Bul týraly AShM-nyń baspasóz qyzmeti málim etti.
«Organic Fish» seriktestigi teńiz akvasharýashylyǵyn damytý jobasyn iske asyrýdy jalǵastyra bermek. Kásiporyn Kaspıı teńiziniń tereń sýly bóliginde zamanaýı torly tehnologııalardy qoldana otyryp, baǵaly albyrt tuqymdas balyqtardy ósirýge mamandanǵan.
Alǵashqy úsh teńiz tory byltyrǵy jylǵy qyrkúıekte ornatyldy. Ár tordyń dıametri 38 metrdi quraıdy. Olarǵa jalpy salmaǵy 20 tonna bolatyn 95 myń dana shabaq jiberildi. Ósirý kezeńinde balyqtar teńiz jaǵdaıyna sátti beıimdelip, olardyń ortasha salmaǵy bastapqy 200 gramnan 1,8–2,5 kılogramǵa deıin artty.
— Kásiporyn alǵashqy 150 tonna taýarlyq balyqty aǵymdaǵy jyldyń qyrkúıeginde alýdy josparlap otyr. Ónim ishki naryqqa baǵyttalady. Bul otandyq balyq óniminiń usynysyn arttyryp, el ishinde balyq óndirý múmkindikterin keńeıtýge múmkindik beredi, — delingen habarlamada.
Óndiris qýatyn kezeń-kezeńimen arttyrý kózdelgen. Bolashaqta kásiporyn jylyna 5 myń tonna taýarlyq balyq óndirý kólemine jetkizýdi josparlap otyr.
Aǵymdaǵy jyly bólingen ýchaskelerge taǵy úsh teńiz tory ornatylady. Olardy iske qosyp, keıin balyqtandyrý jumystaryn qyrkúıek aıynyń basyna deıin aıaqtaý josparlanǵan.
Osylaısha, torlardyń jalpy sany altyǵa jetedi. Jyl sońyna deıin olarǵa 470 myń dana shabaq jiberý josparlanyp otyr. Shabaqtardyń ortasha salmaǵy 200–300 gramm bolǵan kezde, jalpy bıomassa 114 tonnany quraıdy.
Aldaǵy ýaqytta kásiporyn torlardyń sanyn jáne óndiris kólemin kezeń-kezeńimen arttyrady. Josparǵa sáıkes, 2027 jyly taýarlyq balyq óndirisiniń kólemi 1,3 myń tonnany quraıdy. Al 2028 jyly óndiristi jylyna 5 myń tonnaǵa jetkizý josparlanyp otyr.
Kaspıı teńizinde torly ádispen balyq ósirý salanyń jańa tehnologııalyq quzyretterin qalyptastyryp, Qazaqstanda balyqty ónerkásiptik óndirý kólemin arttyrýǵa jaǵdaı jasaıdy.
Óndiristiń ulǵaıýyna qaraı joba óńirdegi balyq sharýashylyǵyn damytýdyń jańa baǵyttarynyń birine aınalyp, ishki naryqty otandyq ónimmen qamtamasyz etýge úles qosatyn bolady.
Aıta keteıik, buǵan deıin Qazaqstanda alǵash ret jylyna 25 myń tonna balyq jemin óndiretin zaýyt salynatynyn jazdyq.
