Kaspııde Ázerbaıjan azamattaryn ustaý kezinde qazaqstandyq shekarashylar 25 ret aýaǵa oq atqan
Bul týraly QR Syrtqy ister mınıstrligi taratqan baspasóz-baıanynan málim boldy, dep habarlaıdy QazAqparat.
Qazaqstan Respýblıkasynyń Ulttyq qaýipsizdik komıteti Shekara qyzmetiniń (QR UQK ShQ) aqparaty boıynsha, 2020 jylǵy 30 sáýirde qazaqstandyq shekarashylar bortynda Ázerbaıjannyń 4 azamaty bar «baıda» úlgisindegi shaǵyn kólemdi kemesin ustaǵan. Bul oqıǵa túngi saǵat 03:55-te (Nur-Sultan ýaqyty boıynsha) Ulyq (Rakýshechnyı) múıisinen ońtústikke qaraı 30 mıl qashyqtyqta bolǵan.
Ustalǵan keme QR aýmaqtyq sýlarynan tabyldy. Shekarany buzýshylar shekara kateri ekıpajynyń halyqaralyq teńiz zańnamasyna sáıkes kemeni toqtatý týraly talaptaryna qaramastan tıisti jaýap qaıtarmaı, memlekettik shekara kateriniń aldynda soqtyǵysýǵa qaýip tóndire otyryp, úlken jyldamdyqta qaýipti manevr jasaǵan.
Shekara buzýshylardy qazaqstandyq sarbazdar 1 saǵat 40 mınýt boıy qýǵan. «QR Memlekettik shekarasy týraly» QR Zańynyń talaptaryna sáıkes kemeni májbúrlep toqtatý úshin shekarashylar qarý qoldanǵan. Osylaısha, qarýdan aýaǵa 25 eskertý retinde oq atyp, 87 ret júrý baǵyty boıynsha jáne 185 ret shekara buzýshylardyń keme qozǵaltqyshtaryna oq jaýdyrǵan.
Qarýdy qoldaný saldarynan úsh quqyq buzýshy jaraqat aldy. Ustaý kezinde zardap shekkenderge dereý alǵashqy medıtsınalyq kómek kórsetildi. Qabyldanǵan sharalarǵa qaramastan, jaǵaǵa kelgen kezde jedel járdem dárigerleri ustalǵan adamdardyń biriniń qaıtys bolǵanyn anyqtady.
Qazirgi tańda QR quzyretti organdary ustalǵandarǵa qatysty QR Qylmystyq Kodeksiniń 392-baby 1-bóligine sáıkes memlekettik shekarany buzý faktisi boıynsha tergeý is-sharalaryn júrgizýde.
QR UQK Shekara qyzmeti habarlaǵandaı, ustalǵan tórt brakonerdiń úsheýi 2017 jyly osy ispettes tártip buzǵany úshin QR zańnamasyna sáıkes 6 aıǵa bas bostandyǵynan aıyrylǵan.
Qazaqstan tarapy qaza tapqan Ázerbaıjan azamatynyń otbasyna kóńil aıtady. Búgin tańerteń qaza tapqan adamnyń denesi Ázerbaıjan tarapyna berildi.
Bul oqıǵadan Ázerbaıjan tarapy tolyq habardar.
Qazaqstan tarapy Ázerbaıjan azamattarynyń QR Memlekettik shekarasyn buzý faktileriniń jıilenýine alańdaýshylyq bildiredi. 2017 jyldan bastap qazirgi ýaqytqa deıin 41 ÁR azamaty ustaldy, onyń 33-i QR Memlekettik shekarasyn buzǵany úshin sottaldy.