Kaspııde áskerı teńizshilerdiń daıyndyǵy synalyp jatyr
ASTANA. KAZINFORM — Qazaqstannyń Kaspıı teńizi sektorynda Áskerı-teńiz kúshteriniń josparly oqý-jattyǵýlary ótip jatyr, dep habarlaıdy Qorǵanys mınıstrliginiń baspasóz qyzmeti.
Áskerı teńizshiler Qazaqstan sektoryna tıesili teńiz aıdynyn tolyq júrip ótip, túrli jaǵdaıdaǵy is-qımyldardy pysyqtap, praktıkalyq atys júrgizedi.
Áskerı teńizshiler úshin bul jattyǵýlar óz daǵdylaryn tikeleı teńizde tekserýge múmkindik beredi. Munda ekıpajdyń úılesimdi is-qımyly, navıgatsııanyń dáldigi men qabyldanǵan sheshimderdiń jedeldigi qoıylǵan mindettiń oryndalýyna tikeleı áser etedi.
Oqý-jattyǵý úsh kezeńnen turady. Áskerı teńizshiler kemeler arasyndaǵy ózara is-qımyldy, navıgatsııa men baılanysty, kemeni basqarýdy jáne qarý-jaraqty qoldanýdy pysyqtaıdy. Jaǵalaýdan edáýir qashyqtyqta ornalasqan ekıpajdardyń is-qımylyna erekshe nazar aýdarylady.
Áskerı-teńiz kúshteri Bas qolbasshysynyń jaýyngerlik daıarlyq jónindegi orynbasary 1-shi dárejeli kapıtan Arman Satqanovtyń aıtýynsha, oqý-jattyǵý barysynda ekıpajdardyń tájirıbelik daǵdylaryn odan ári jetildirýge basa mán beriledi.
— Eń bastysy — árbir ekıpaj múshesi óz mindetin naqty bilýi jáne qajetti sátte jedel ári úılesimdi áreket etýi kerek. Qazir teńizde osy daǵdyny tekserip jatyrmyz, — dedi 1-shi dárejeli kapıtan Arman Satqanov.
Jattyǵý barysynda ekıpajdar keme qarý-jaraǵynan praktıkalyq atys júrgizip, birlesken is-qımyldardy pysyqtaıdy. Jattyǵýdyń ár kezeńinen ótken saıyn tapsyrmalar kúrdelene túsedi. Oǵan qosymsha bólimsheler de tartyldy.
Oqý-jattyǵý keme ekıpajdarynyń túrli jaǵdaılarda mindetterdi oryndaýǵa daıyndyǵyn tekserýge jáne Áskerı-teńiz kúshteriniń jaýyngerlik daıarlyǵyn odan ári jetildirýge múmkindik beredi.
Buǵan deıin Qazaqstan Áskerı-teńiz kúshteriniń ofıtseri bes tildi meńgergenin jazǵanbyz.
