Kaspııde áskerı teńizshiler áýe jáne sýasty qaterlerine qarsy jattyǵý ótkizdi
ASTANA. KAZINFORM — Qazaqstannyń Kaspıı teńizi sektorynda Áskerı-teńiz kúshteriniń «Hazar Qorǵany – 2026» oqý-jattyǵýy ótti. Oǵan Áskerı-teńiz kúshteriniń kemeleri men katerleri, gıdrografııalyq kemeleri, QR UQK Shekara qyzmetiniń Mańǵystaý oblysy boıynsha departamentiniń kemeleri jáne Áýe qorǵanysy kúshteriniń avıatsııasy qatysty.
Áskerı manevrler barysynda áskerı qyzmetshiler birlesken manevr jasaý, izdestirý-qutqarý jumystaryn uıymdastyrý, sondaı-aq bazalyq pýnktte jáne qorǵalmaǵan reıdte asımmetrııalyq qaterlerge toıtarys berý is-qımyldaryn pysyqtady.
— Bul oqý-jattyǵý Áskerı-teńiz kúshteriniń joǵary jaýyngerlik ázirligin qamtamasyz etýdiń mańyzdy quramdas bóligi. Ol komandırlerdiń praktıkalyq daıarlyǵyn jáne jeke quramnyń teńizde áreket etý mashyǵyn jetildirýge, sondaı-aq jaýyngerlik is-qımyldardy uıymdastyrý kezinde basqarý organdarynyń ózara is-qımylyn arttyrýǵa baǵyttalǵan. Ártúrli jaǵdaıda áskerı teńizshiler ekıpajdardyń ózara is-qımylyn jáne nysanalardy anyqtaý men joıýdyń zamanaýı quraldaryn qoldanýdy pysyqtady, — dedi Áskerı-teńiz kúshteriniń bas qolbasshysy 1-shi dárejeli kapıtan Qanat Nııazbekov.
Oqý-jattyǵýda ushqyshsyz ushý apparattaryn qoldaný jáne olarǵa qarsy is-qımyl jasaýǵa erekshe nazar aýdaryldy. Áskerı qyzmetshiler sýasty dıversııasyna qarsy qorǵanys, áýe shabýyly quraldaryn anyqtaý jáne áýe shabýylyna qarsy qorǵanysty uıymdastyrý boıynsha is-qımyldardy pysyqtady.
«Hazar Qorǵany — 2026» áskerı-teńiz oqý-jattyǵýy Qazaqstan Áskerı-teńiz kúshteriniń jaýyngerlik daıarlyǵyn jetildirý, bólimshelerdiń ózara is-qımylyn kúsheıtý jáne jeke quramnyń eldiń teńiz shepterin qorǵaý mindetterin oryndaýǵa ázirligin arttyrý baǵytyndaǵy kezekti kezeń boldy.
Buǵan deıin Qazaqstannyń Kaspıı teńizi sektorynda Áskerı-teńiz kúshteriniń josparly oqý-jattyǵýlary ótken bolatyn.
