Kaspııde 9-synyp bitirgen jasóspirim sýǵa batyp ketti

ASTANA. QazAqparat – Munaıly aýdanynda 9-synypty bitirgen 24 oqýshy oqý jylynyń aıaqtalýyn atap ótý úshin avtobýs jaldap, Kaspıı teńizindegi «Golýbaıa býhta» jaǵajaıyna barǵan. Onda oqys jaǵdaı bolyp, bir jasóspirim qaza boldy, dep habarlaıdy QazAqparat Lada.kz-ke silteme jasap.

«Oqıǵa saldarynan bir adam qaza taýyp, taǵy tórteýi aýrýhanaǵa jatqyzyldy. Oqıǵa kezinde olardyń janynda synyp jetekshisi boldy. Sońǵy qońyraýǵa deıin aldyn alý sharalaryn júrgizip, oqýshylardyń tabıǵatqa shyǵýyna tyıym salý týraly aqparat jarııalaǵanymyzǵa qaramastan, muǵalim qaladan shyǵýǵa ruqsat bergen. Óreskel buzýshylyqqa jol bergeni, sondaı-aq óz mindettemelerine nemquraıly qaraǵany úshin muǵalimge sógis jarııalandy», - dedi Mańǵystaý oblysy bilim basqarmasynyń basshysy Dınara Jumasheva.

Sýǵa batqan jasóspirimderdiń úsheýi sýdan ózderi shyǵa aldy, taǵy ekeýin kýágerler qutqardy. 2007 jylǵy bir jas jasóspirim aýrýhanaǵa bara jatqanda kólikte qaıtys boldy.

Habarlanǵandaı, úsh boıjetken aýrýhanada jatyr. Olardyń jaǵdaıy ortasha dárejede. 2008 jylǵy taǵy bir qyz bala jansaqtaý bólimine jatqyzyldy. Onyń jaǵdaıy aýyr. Oqýshynyń qaıtys bolý faktisi boıynsha sot-medıtsınalyq saraptama taǵaıyndaldy.