Kaspııdi baǵyndyrǵan alǵashqy shtýrman áıel
AQTAÝ. KAZINFORM — Aqtaýlyq Ásııa Býkaeva — Qazaqstandaǵy Kaspıı teńizin baǵyndyrǵan alǵashqy áıel shtýrman. Ol Kaspııdiń jaǵalaýynda ósip, bala kezinen teńizshi bolýdy armandaǵan. Er azamattarmen ıyq tirese qyzmet atqaryp júrgen qaısar áıel Kazinform tilshisi suhbat berdi.
Ásııa Býkaevanyń ómiri 18 jyldan beri teńizben tyǵyz baılanysty. Ol 2008 jyly Reseıde admıral F. F. Ýshakov atyndaǵy Teńiz akademııasyn támamdap, Aqtaýda teńiz qurylysy jáne munaı óndirisine jabdyqtar daıyndaıtyn iri kompanııada alǵashqy eńbek jolyn bastaǵan. Osy jyldar ishinde Ásııa kapıtannyń ekinshi kómekshisinen aǵa kómekshi dárejesine deıin kóterildi.
— Men Aqtaýda, Kaspıı teńiziniń jaǵasynda óstim. Bala kezimnen teńiz ómirimniń ajyramas bóligi boldy. Men teńiz keńistigin baǵyndyryp, áıel adamnyń erlermen teń dárejede teńizshi bola alatynyn dáleldeýdi armandadym. Dál osy ishki umtylys meni ýaqyt óte kele shtýrman mamandyǵyna alyp keldi. Teńizge degen mahabbatym — Qazaqstandaǵy alǵashqy áıel-shtýrman bolýyma sebep boldy, — deıdi Ásııa Býkaeva.
Ásııanyń ákesi quqyq qorǵaý organdarynda qyzmet etse, anasy dáriger. Onyń shtýrman mamandyǵyn tańdaýyna ákesi men atasy qoldaý bildirgen.
— Men qarapaıym otbasynda óstim. Mamandyǵymdy tańdaýyma ákem men atam erekshe áser etti. Atam teńizshi bolyp, teńiz jáne ózen flotynda qyzmet etti, maǵan teńizge degen súıispenshilik pen kásibı qundylyqtardy darytty. Olardyń qoldaýy men aqyl-keńesiniń arqasynda men óz maqsatyma senimdi túrde qadam bastym jáne teńiz salasyndaǵy jolymdy tańdadym. Bul men úshin shynaıy ómirlik mıssııaǵa aınaldy, — deıdi Ásııa.
Ásııa admıral F. F. Ýshakov atyndaǵy Teńiz akademııasyna Qazaqstannan túsken alǵashqy stýdentterdiń biri ári, sol toptaǵy jalǵyz qyz boldy. Onyń aıtýynsha oqý óte kúrdeli, teorııa men tájirıbe qatar júrgen. Ol teńizge alǵash ret munaı tasymaldaıtyn tankermen shyqqan.
— Bul meniń alǵashqy kásibı tájirıbem boldy. Ol umytylmas áser qaldyryp, shtýrman retindegi qyzmetimdi jalǵastyrýǵa degen nıetimdi túbegeıli nyǵaıtty. Navıgatsııa, keme aspaptarymen jumys, marshrýttardy esepteý jáne kúrdeli jaǵdaılarda sheshim qabyldaý — akademııada meńgergen osy daǵdylarym jumys barysynda paıdama jarady, — deıdi ol.
Ásııa Býkaevanyń aıtýynsha, jyldar óte kele áıel-shtýrmandarǵa degen kózqaras aıtarlyqtaı ózgergen.
— Alǵashqy kezde áıel adam teńizde erlermen teń dárejede jumys isteı almaıdy degen kózqaraspen jıi betpe-bet keldim. Muny jeńý úshin kásibılikke mán berip, óz bilimim men qabiletimdi kórsettim. Buryn kúmánmen qarasa, búginde Qazaqstan flotynda áıelderdi teń quqyly maman retinde qabyldaıdy. Qýantatyny bul joldy tańdaǵan qyzdar sany artyp keledi. Eń qıyny keme, ekıpaj jáne júktiń qaýipsizdigine degen joǵary jaýapkershilik. Ásirese kúrdeli aýa raıy men navıgatsııalyq jaǵdaıda ár sheshim dál bolýy kerek. Al, teńizdegi erkindik sezimi jáne sátti oryndalǵan marshrýt meni odan saıyn shabyttandyrady, — deıdi Ásııa.
2011 jyly Ásııa «Mańǵystaý» kompanııasynyń alǵashqy muzjarǵysh kemesiniń kindik anasy bolǵan. Saltanatty rásim Aqtaý portynda ótken.
— Bul meniń kásibı ómirimde máńgi este qalatyn erekshe sát boldy. Ol meniń kompanııa men sala damýyna qosqan úlesimniń mańyzyn aıqyndaıdy. Sol kezdegi tolqynys pen maqtanysh sezimin sózben jetkizý múmkin emes. Ózimdi kompanııamyz ben Qazaqstan floty úshin asa mańyzdy oqıǵanyń bir bólshegi retinde sezindim, — deıdi ol.
Ásııa Býkaeva jaqsy shtýrman bolý úshin jaýapkershilik, kúrdeli jaǵdaılarda durys sheshim qabyldaı bilý, kúızeliske tózimdilik pen sabyr saqtaý asa mańyzdy ekenin aıtady. Sebebi, bul kemeniń jáne ekıpajdyń qaýipsizdigine tikeleı áser etedi. Teńiz keńistigin baǵyndyrǵan jas maman búginde bala kútimimen ýaqytsha demalysta.
Buǵan deıin, Mańǵystaýlyq ekolog Kaspııdi saqtap qalýdyń jalǵyz jolyn aıtqan bolatyn.