Kaspıı jaǵasynda 500 oryndyq balalar oıyn-saýyqtyrý lageri salynady - Atyraý
ATYRAÝ. QazAqparat - Atyraý oblysynyń ákimi Nurlan Noǵaev Isataı aýdanyna jumys saparymen barǵan kezinde birneshe áleýmettik, óndiristik nysandardyń qurylystarymen jáne jumystarymen tanysty.
Bul týraly óńir basshysynyń resmı saıty habarlaıdy.
Taıaý bolashaqta Kaspıı teńiziniń jaǵasynda 500 oryndyq balalar oıyn-saýyqtyrý lageri salynady. Qazir jobalaý-smetalyq qujattamasy daıyndalýda. Isataı aýdany teńiz jaǵasynda ornalasqandyqtan, tolyqqandy demalys orny salynyp, aımaqtyń týrıstik tartymdylyǵyn kóterýge múmkindik beredi.
Aýyz sýmen qamtý máselesi de sheshilip jatyr. Nurlan Noǵaev Jasqaırat, Qyzyl úı eldimekenderindegi sý qubyry qurylysyn tekserdi. Jasqaıratqa sý bıyl naýryz aıynda, ekinshisine qarashada beriledi.
Janbaı aýylynda aımaq basshysy polıtsııa bólimshesiniń, mádenıet úıiniń jumysymen tanysty. Balyq ónimderin shyǵaratyn tsehqa bardy. Munda balyq aýlaýdan bastap daıyn ónim shyǵarýǵa deıin óndiristiń tolyq kezeńin iske qosý josparlanýda. Qazir jabdyqtar ornatylyp jatyr, óndiris aldaǵy sáýir aıynda jumysyn bastaıdy.
-Biz balyqtyń barlyq túriniń etin, tartylǵan etti, keptirilgen, qaqtalǵan balyqty shyǵarýdy josparlap otyrmyz, -deıdi tseh dırektory Abdolhasan Uǵybaı. - Munda jergilikti turǵyndardan 80 adam jumysqa tartylady. Alǵa qaraı ónimderimizdi Eýropaǵa eksportqa shyǵarý josparda bar.
Oblys ákimi osyndaı óndiristerdi ashý aımaq ekonomıkasynyń ósýine oń yqpal etetinin aıtyp, kásipkerlerge jergilikti atqarýshy organdar tarapynan memlekettik qoldaý sharalary kórsetiletinine toqtaldy.
Aqqystaý selosynda oblys ákimi dene shynyqtyrý-saýyqtyrý kesheni qurylysynyń barysymen tanysty. Qurylys bıyl sáýir aıynda aıaqtalyp, paıdalanýǵa beriledi. Osyndaı sport keshenderi tórt aýylda salynady, JSQ daıyndalyp jatyr.
Nurlan Noǵaev aýysymyna 400 kg makaron ónimderin shyǵaratyn tsehta da boldy. Jaqynda ashylǵan tseh dırektory Zaıyphan Naýryzbaeva: -Bıznesti qoldaý baǵdarlamasy boıynsha osy isti qolǵa aldyq,-deıdi. -Alǵashynda eki túrli makaron ónimin shyǵardyq, qazir jetige jetti. Aýdan turǵyndary ónimderimizdi unatty, suranys bar. Baǵasy da qoljetimdi».
Nurlan Noǵaev aqpan aıynda paıdalanýǵa beriletin, aýyl turǵyndary úshin memlekettik qyzmet kórsetýlerdi qoljetimdi etetin halyqqa qyzmet kórsetý ortalyǵynyń qurylysyna da bardy.
