Kaspıı jaǵalaýyndaǵy órt: 550 gektar aýmaqta qamys janǵan
ATYRAÝ. QazAqparat – Kaspıı teńiziniń jaǵalaýynda 550 gektar aýmaqtyń qamysy órtengen, dep habarlaıdy QazAqparat.
Atyraý oblystyq tótenshe jaǵdaılar departamenti baspasóz qyzmetiniń málimetine súıensek, búgin, 11 qazanda jergilikti ýaqytpen saǵat 12:00-ge deıin jaǵalaýdaǵy qamys órtiniń eki frontaldy janý oshaǵy anyqtalǵan.
«Onyń biri Isataı men Qurmanǵazy aýdanynyń shekarasyndaǵy Maqash aýyldyq okrýginiń, al, ekinshisi Teńiz aýyldyq okrýginiń aýmaǵynda ornalasqan. Órtengen aýmaq 550 gektardy quraıdy. Búginge deıin 420 gektar aýmaqtyń órti sóndirildi. Onyń ishinde sý aǵyzý qurylǵysynyń kómegimen 35 gektarda, jeke quramnyń kúshimen 197 gektarda janǵan jalyn joıyldy. Al, 188 gektardyń órti ózdiginen sóndi» -dep habarlady departamenttiń baspasóz qyzmeti.
Kaspıı teńiziniń jaǵalaýyndaǵy qamys órtin sóndirýge «Qazavıaqutqarý» AQ-nyń tikushaǵymen aerovızýaldy tekserý júrgizilgen. Tikushaqtyń sý shashý qurylǵysymen 21 ret sý tógildi. Jalyndy sóndirý úshin tógilgen sýdyń mólsheri 63 tonnany quraǵan.
Búgin órtti sóndirýge Atyraý oblystyq tótenshe jaǵdaılar departamentiniń jeke quramynan 34 adam, 5 tehnıka, 4 motosorǵysh, 1 generator, 40 jeń, 1 úrlemeli shatyr, O.Kóshekov atyndaǵy Atyraý agrarlyq-tehnıkalyq kolledjinen 1 adam, 1 John Deere-6135b traktory, sondaı-aq, «Qazavıaqutqarý» AQ-nyń 5 qyzmetkeri men «MI-871» tikushaǵy jumylǵan.
Eske sala ketelik, budan buryn Kaspıı jaǵalaýyndaǵy qamys órtin sóndirýge tikushaqpen 30 tonna sý tógilgenin habarlaǵan edik.
