Kaspıı jaǵalaýyndaǵy qamys órtiniń oshaǵynan eki órt sóndirýshi evakýatsııalandy

ATYRAÝ. QazAqparat – Atyraý oblysynda Kaspıı teńiziniń jaǵalaýyndaǵy qamys órtiniń oshaǵynan eki órt sóndirýshi qaýipsiz jerge evakýatsııalandy. Qutqarýshylardyń jol talǵamaıtyn TREKOL kóligi túgi qalmaı janyp ketti, dep habarlaıdy QazAqparat tilshisi.

Oblystyq tótenshe jaǵdaılar departamenti qoǵammen baılanys tobynyń aqparatyna súıensek, búgin, 20 qyrkúıekte keshki saǵat 20:00-de qamys órtiniń aýmaǵy ulǵaıǵan.

«Qazir Atyraý qalasyndaǵy Tasqala aýylynan 40 shaqyrym qashyqtyqta Kaspıı teńiziniń jaǵalaýyndaǵy qamys janyp jatyr. Tótenshe jaǵdaılar departamentiniń TREKOL kóligi teńiz jaǵalaýyndaǵy batpaqqa batyp qaldy. Qamys órti jol talǵamaıtyn kóligin sharpyp, ondaǵy eki órt sóndirýshige qaýip tóndi. Qazir órt oshaǵynda qalǵan kólikten eki órt sóndirýshi qaýipsiz jerge evakýatsııalandy. Olar din aman, zardap shekken joq. Al, TREKOL kóligi janyp ketti», -dep habarlady departamenttiń qoǵammen baılanys toby.

Kaspıı teńiziniń jaǵalaýyndaǵy qamys órtinen eldi mekenderge qaýip tónip turǵan joq.

Alaıda, Atyraý qalasynda tútinniń ıisi sezilip tur. Shahar kóshelerinde órtengen qamystyń kúli ushyp júr.

Oblystyq tótenshe jaǵdaılar departamentiniń 25 qyzmetkeri jaǵalaýdaǵy qamys órtin sóndirýdi jalǵastyryp jatyr.

Eske sala ketelik, buǵan deıin Kaspıı jaǵalaýyndaǵy qamys órti bir aptadan beri sónbeı turǵanyn habarlaǵan bolatynbyz.