Kaspıı jaǵalaýyndaǵy qamys órtiniń aýmaǵy 690 gektarǵa jetti
Atyraý oblystyq Tótenshe jaǵdaılar departamentiniń qoǵammen baılanys tobynan málim etkendeı, búgin, 9 shildede teńiz jaǵalaýyndaǵy qamys órtiniń aýmaǵy taǵy ulǵaıǵan.
«Atyraý oblysynda Kaspıı teńiziniń jaǵalaýynda órtengen qamystyń aýmaǵy - 690 gektar. Aerovızýaldy barlaý jumystarynyń qorytyndysymen janyp jatqan órt oshaqtary anyqtalmady. Alaıda qamys byqsyp jatyr. Búgin, 9 shildede 08:30 saǵattaǵy aqparatqa sáıkes «Kazavıaqutqarý» AQ-nyń STQ-5 qondyrǵysy bar MI-8 tikushaǵymen 11 ret sý tógildi», - dep habarlady departamenttiń qoǵammen baılanys toby.
Órtengen qamysty sóndirýge Atyraý oblysynyń Tótenshe jaǵadaılar departamenti men «Aqjaıyq» memlekettik tabıǵı rezervatynan, «Kazavıaqutqarý» AQ-dan 97 adam, 15 tehnıka, 4 motopompa jumyldyryldy.
Eske sala keteıik, Kaspıı jaǵalaýynda 6 shildeden beri qamys órtenip jatyr.
Atyraý oblystyq Tótenshe jaǵdaılar departamenti basshysynyń mindetin atqarýshy Asqat Erjanovtyń málimetinshe, Kaspıı teńiziniń jaǵalaýyndaǵy órttiń tutanǵany keshki saǵat 20:00 shamasynda belgili bolǵan.
«Qamys órti Atyraý qalasyndaǵy Keńózek aýyldyq okrýginen 30 shaqyrym qashyqtyqta tirkeldi. Sol kúni keshkisin órt aýmaǵyn baqylaý úshin 12 qyzmetker jiberildi», - dep málim etken edi Asqat Erjanov.
Keıin Kaspıı jaǵalaýyndaǵy qamys órti 450 gektarǵa jaıylǵanyn jazǵan bolatynbyz.
Sondaı-aq, qamys órtin sóndirýge Qyzylordadan tikushaq tartylatynyn habarlaǵan edik.
Al, keshe jaǵalaýdaǵy qamys órtine tikushaqpen 60 tonnaǵa jýyq sý tógildi.
