Kaspıı jaǵalaýyndaǵy qamys órtin sóndirýge tikushaq tartyldy
Oblystyq tótenshe jaǵdaılar departamentiniń qoǵammen baılanys tobynan málim etkendeı, búgin, 21 qyrkúıekte tańerteńgi saǵat 7:30-da tikushaq órtti sóndirý úshin ushyp shyqqan.
«Kaspıı teńiziniń jaǵalaýynda janyp jatqan qamys órtin áýeden sý shashý arqyly óshirýge sheshim qabyldandy. Oǵan sý shashý qurylǵysy bar «KazAvıaSpaz» AQ-nyń MI-8 tik ushaǵy tartyldy. Áýeden barlaý kezinde teńiz jaǵalaýynda qamys órtiniń eki oshaǵy anyqtaldy. Eki órt oshaǵynyń aýmaǵy – 400h2 metr. Buǵan qosa 1 gektar aýmaqta qamys tutanyp, byqsyp jatyr», -dep habarlady departamenttiń qoǵammen baılanys toby.
MI-8 tikushaǵy ekıpjanyń quramynda 5 adam bar. Tikushaqpen áýeden sý shashý jumysy bastaldy.
«Kaspıı jaǵalaýyndaǵy qamys órti 14 qyrkúıekte jergilikti saǵatpen 20:40 shamasynda tutandy. Keshe, 20 qyrkúıekte teńiz jaǵalaýyndaǵy órttiń aýmaǵy 60 gektarǵa jetti.
Órtti sóndirýge tartylǵan jol talǵamaıtyn TREKOL kóligi batpaqqa batyp, órt oshaǵynda qalyp qoıdy. Kólikte bolǵan eki órt sóndirýshige qaýip tóndi. Sol sebepten, órt sóndirýshiler qaýipsiz jerge jedel evakýatsııalandy. Jol talǵamaıtyn TREKOL kóligi janyp ketti. Al, keshki saǵat 19:40 shamasynda ot «Aqjaıyq» memlekettik tabıǵı rezervatynyń aýmaǵyna jaıyldy», -dep málim etken edi departamentten.
Qazir oblystyq oblystyq tótenshe jaǵdaılar departamentinde jedel shtab quryldy.
Qamys órti baqylaýǵa alyndy. Eske sala ketelik, buǵan deıin Kaspıı jaǵalaýyndaǵy órt «Aqjaıyq» tabıǵı rezervatyna jaıylǵanyn habarlaǵan bolatynbyz.