Kaspıı jaǵalaýyndaǵy qamys órtin sóndirý jalǵasýda

ATYRAÝ. QazAqparat – Atyraý oblysynda Kaspıı jaǵalaýyndaǵy qamys órtin sóndirý áli jalǵasyp jatyr, dep habarlaıdy QazAqparat.

Oblystyq Tótenshe jaǵdaılar departamenti baspasóz qyzmetiniń málimetinshe, 13 qazan, saǵat 09:00-degi jaǵdaı boıynsha, qamys órtengen jaǵalaýdan jaqyn mańdaǵy eldi mekenderge qaýip joq. Ashyq jalyn baıqalmaıdy.

«Ótken táýlikte 40 gektar aýmaqtaǵy qamys órti sóndirildi. Onyń ishinde departamenttiń jeke quramy 25 gektardaǵy jalyndy joıdy. Al, 15 gektarda janǵan qamys órti ózdiginen sóndi.

Qamystyń janǵan aýmaǵy 550 gektardy quraıdy. Osy kezge deıin 490 gektar aýmaǵy sóndirildi», - dep habarlady departamenttiń baspasóz qyzmeti.

Órtti joıýǵa oblystyq tótenshe jaǵdaılar departamentiniń jeke quramynan 31 adam, 5 tehnıka tartylǵan.

Eske sala ketelik, budan buryn Kaspıı jaǵalaýyndaǵy 450 gektar aýmaqta qamys órti sóndirilgenin habarlaǵan edik.