Kaspıı jaǵalaýyndaǵy qamys órti áli tolyq sóngen joq
Atyraý oblystyq tótenshe jaǵdaılar departamentiniń qoǵammen baılanys tobynan málim etkendeı, Kaspıı teńiziniń jaǵalaýyndaǵy «Aqjaıyq» memlekettik tabıǵı rezervat aýmaǵyndaǵy qamys órti keshe, 2 sáýirde saǵat 9:12 shamasynda anyqtalǵan.
«Búgin, 3 sáýirde tótenshe jaǵdaılar departamentiniń órt sóndirýshileri saǵat 8:30-da qamys órtengen aýmaqqa jetti. Jalyndy sóndirýge departamenttiń 38 qyzmetkeri, 4 tehnıkasy, «Aqjaıyq» memlekettik tabıǵı rezervatynan 30 adam, 9 tehnıka, 2 qaıyq, 4 motopompa jumyldyryldy», -dep habarlady departamenttiń qoǵammen baılanys tobynan.
Eske sala ketelik, buǵan deıin Kaspıı jaǵalaýynda janǵan qamys tútini Atyraýdy basyp qalǵanyn habarlaǵan edik.
«Kaspıı teńiziniń jaǵalaýyndaǵy «Aqjaıyq memlekettik tabıǵı rezervatynyń aýmaǵynda qamys janyp jatyr. Bul – Atyraý qalasynyń mańyndaǵy Damby aýylynan 30 shaqyrym qashyqtyqtaǵy aýmaq. Búgin, 2 sáýirde jergilikti ýaqytpen saǵat 19:00 shamasynda qamys órti shamamen 85 gektar aýmaqty sharpydy. Tótenshe jaǵdaılar departamenti men «Aqjaıyq» memlekettik tabıǵı rezervatynyń qyzmetkerleri 80 gektar aýmaqtaǵy órtti sóndirdi. Jel ekpini órtti sóndirýge qıyndyq keltirip tur. Eldi mekenderge tónip turǵan qaýip joq», -dep málim etken edi departamenttiń qoǵammen baılanys tobynan.
Sondaı-aq, Atyraý oblysynyń Reseımen shekarasyndaǵy Qıǵash ózeniniń jaǵalaýynda qamys órtengenin jazǵan bolatynbyz.
Atyraý turǵyndary aýadaǵy sasyq ıiske shaǵymdanǵan edi.
Keıin ekologtar Atyraý aýasynda kúkirtti sýtek shekti normadan asyp ketkenin málim etti.
