Kaspıı jaǵalaýyndaǵy qamys órti áli tolyq sóngen joq

ATYRAÝ. QazAqparat – Atyraý oblysynda Kaspıı teńiziniń jaǵalaýyndaǵy qamys órti áli tolyq sóngen joq. Búgin órtti sóndirýge tikushaq taǵy da ushyp shyqty, dep habarlaıdy QazAqparat tilshisi.

Oblystyq tótenshe jaǵdaılar departamenti qoǵammen baılanys tobynyń aqparatyna qaraǵanda, búgin, 22 qyrkúıekte teńiz jaǵalaýynda qamys órtiniń byqsyp jatqany anyqtalǵan.

«Búgin jergilikti ýaqytpen saǵat 08:10-da Atyraý qalasyndaǵy áýejaıdan Kaspıı teńiziniń jaǵalaýyndaǵy qamys órtin sóndirý maqsatynda «QazAvıaQutqarý» AQ-nyń MI-8 VSÝ-5 tikushaǵy ushyp shyqty. Áýeden sý shashatyn qurylǵysymen jabdyqtalǵan tikushaq ekıpajynyń quramynda 5 adam bar. Tikushaq bortyndaǵy oblystyq tótenshe jaǵdaılar departamentiniń 2 qyzmetkeri qamys órtiniń aýmaǵyna áýeden baqylaý júrgizedi. Tikushaqqa qajetti sý órt sharpyǵan aýmaqqa jaqyn mańdaǵy kólden alynady», -dep habarlady departamenttiń qoǵammen baılanys toby.

Buǵan qosa órtti sóndirýge tótenshe jaǵdaılar departamentiniń 25 qyzmetkeri 7 tehnıkamen, «Aqjaıyq» memlekettik tabıǵı rezervatynan 20 qyzmetker, 5 tehnıka jiberildi.

Qazir teńiz jaǵalaýyndaǵy meteorologııalyq jaǵdaı alańdatarlyqtaı emes. Óıtkeni, ońtústik-shyǵystan soqqan jeldiń ekpini – 6-7 metr/sekýnd, aýa temperatýrasy +20 0 S shamasyn kórsetip tur.

«Qamys órtine keshe, 21 qyrkúıekte kúndiz tikushaqtyń sý shashý qurylǵysymen áýeden 33 márte sý tógildi. Sonyń nátıjesinde qamys órtiniń bir oshaǵy, shamamen 400 sharshy metr aýmaqtaǵy jalyn sóndirildi. Al, keshke deıin áýeden 66 ret sý shashylyp, 3 gektardaǵy órt joıyldy», -dep málim etti departamenttiń qoǵammen baılanys toby.

Eske sala ketelik, buǵan deıin Kaspıı jaǵalaýyndaǵy 7 gektar jerde qamys órti áli sónbegenin jazǵan edik.