Kaspıı jaǵalaýyndaǵy qamys órti 450 gektarǵa jaıyldy
Atyraý oblystyq tótenshe jaǵdaılar departamenti qoǵammen baılanys tobynyń aqparatyna qaraǵanda, jaǵalaýdaǵy qamys órtiniń aýmaǵy ulǵaıǵan.
«Búgin, 8 shildede saǵat 13:00-degi jaǵdaı boıynsha qamys ósimdikteriniń janý aýmaǵy 450 gektar boldy. Onyń ishinde 50 gektary ashyq otpen janyp jatyr. Qamys órtin sóndirýge tótenshe jaǵdaılar departamentiniń 38 qyzmetkeri men 6 tehnıkasy jumyldyryldy. Qutqarýshylarmen birge jalyndy aýyzdyqtaýǵa «Aqjaıyq» memlekettik tabıǵı rezervatynan 28 qyzmetker jáne 9 tehnıka, 4 motopompa tartyldy», - dep habarlady departamenttiń qoǵammen baılanys toby.
Eske sala ketelik, budan buryn Atyraý oblysynda Kaspıı jaǵalaýynda taǵy qamys órtenip jatqanyn jazǵan bolatynbyz.
Keıin Atyraý oblysynda Kaspıı jaǵalaýyndaǵy 5 gektarda qamys órtiniń 5 oshaǵy anyqtalǵanyn habarlaǵan edik.
Sondaı-aq, Kaspıı jaǵalaýyndaǵy qamys órtin sóndirýge Qyzylordadan tikushaq tartylatyny aıtyldy. Keshe, 7 shildede saǵat 21:00-de qamys órtiniń aýmaǵy 20 gektar boldy. Jaǵalaýdaǵy qamys órtin sóndirý saǵat 9:00-de bastaldy. Keshke deıin shamamen 5 gektar aýmaqtaǵy qamys órti sóndirilgen.
«Qamys órtin sóndirýge jaǵalaýdyń sýly-batpaqty bolǵany qıyndyq keltirip otyr. Sol sebepten, 8 shildede teńiz jaǵalaýyndaǵy órt oshaqtaryn sóndirý úshin Qyzylorda qalasynan sý tógetin qurylǵysy ornatylǵan MI-8 tikushaǵyn tartý josparlanǵan. Órt oshaǵynyń odan ári taraýyn boldyrmaý úshin aınalasyndaǵy jerdi jyrtýǵa soqasy bar K-700 traktory tartylady», -dep habarlady departamenttiń qoǵammen baılanys toby.
