Kaspıı jaǵalaýyndaǵy qamys órti 16 gektarǵa jetti

ATYRAÝ. QazAqparat – Atyraý oblysynda Kaspıı jaǵalaýyndaǵy qamys áli janyp jatyr. Órt sharpyǵan aýmaq 16 gektarǵa jetti, dep habarlaıdy QazAqparat tilshisi.

Oblystyq tótenshe jaǵdaılar departamentiniń qoǵammen baılanys tobynyń málimetinshe, Kaspıı teńiziniń jaǵalaýyndaǵy qamys órtiniń aýmaǵy 16 gektarǵa jaıylǵan.

«17 qyrkúıek, saǵat 19:45-tegi jaǵdaı boıynsha Atyraý qalasyndaǵy Keńózek aýyldyq okrýginen Kaspıı teńizine qaraı 40 shaqyrym jerde jana bastaǵan qamys órtiniń aýmaǵy shamamen 16 gektarǵa jetti. Qamys 14 qyrkúıekten beri janyp jatyr. Teńiz jaǵalaýyndaǵy aýmaqtyń batpaq bolýyna baılanysty otty sóndirýge múmkindik joq. Ońtústikten soqqan jeldiń ekpini – 4 metr/sekýnd. Jeldiń baǵyty Atyraý qalasyna qaraı bolǵandyqtan, tútinniń ıisi sezilip tur. Alaıda, órtten eldi mekenderge qaýip tónip turǵan joq», - dep málim etti departamenttiń qoǵammen baılanys tobynan.

Teńiz jaǵalaýyndaǵy qamys órtin eldi mekenderge taralýynyń aldyn alýǵa Atyraý oblystyq tótenshe jaǵdaılar jáne polıtsııa departamentterinen 18 qyzmetker men 5 tehnıka tartylǵan.

Eske salaıyq, Atyraý qalasynan 30 shaqyrym jerde 6 gektar aýmaqta qamys janyp jatqanyn habarlaǵan edik. Ot 14 qyrkúıek kúni saǵat 20:40-ta tutanǵan. Keıin qamys órtin sóndirýge teńiz jaǵalaýyndaǵy batpaq kedergi bolyp turǵanyn jazǵan bolatynbyz.