Kaspıı jaǵalaýyndaǵy ıtbalyqtardyń ólý sebebin mamandar anyqtaı almady
ALMATY. QazAqparat - Mańǵystaý oblysynda ólgen ıtbalyqtardyń qyrylý sebebin anyqtaý múmkin bolmady. Sebebi, olardyń ólekseleri shirip ketkendikten synama alyp, zertteýge jiberýge jaramady, deıdi Mańǵystaý oblysynyń ekologııalyq ınspektory.
«Mańǵystaý oblysynyń aýyl sharýashylyǵy mamandary jaǵadan tórt ıtbalyq tapty. Patalogııalyq analız jasaýǵa ıtbalyqtardyń ólekseleri shirip ketkendikten jaramady. Sonyń sebebinen eshqandaı analız jasalynbaıdy degen akt toltyryldy. Biz óz tarapymyzdan aýa men sýdyń synamalaryn zerttedik.Ol ekologııalyq normadan aspaǵanyn kórsetti. Quzyrly organdarǵa munyń nátıjesin akt pen hattamalar arqyly berdik. Itbalyqtardyń ólimine qatysty boljamdar bar. Birinshiden, olar qartaıǵan, óz ajalynan ólgen bolýy múmkin. Ekinshiden, aýǵa túsip qalyp, brakonerler teńiz ortasyna laqtyryp ketken bolýy yqtımal. Sosyn jel tolqyǵanda jaǵaǵa shyǵyp qalǵan. Biraq, mundaı qorytyndyǵa naqty toqtalý úshin olardyń ólekselerin zerthanaǵa jiberý kerek boldy. Ol múmkin bolmaǵandyqtan biz tek boljam aıtyp otyrmyz. Jyl saıyn ıtbalyqtardyń ólý normasy bar. Bul jerde jappaı qyrylý baıqalmaǵandyqtan sol normadan asqan joq», - deıdi Mańǵystaý oblysy boıynsha memlekettik ekologııalyq ınspektor Beknar Bekentaev.
Eske sala keteıik buǵan deıin Mańǵystaý oblysy boıynsha bas memlekettik ınspektor Baýyrjan Ámirbekov «QazAqparat» tilshisine Fort-Shevchenko qalasy mańyndaǵy Kaspıı teńizi jaǵalaýynda tabylǵan óli ıtbalyqtardy anyqtaý úshin arnaıy mamandar jiberilgenin aıtqan bolatyn.
«Kazgıdromet» RKM Mańǵystaý oblysyndaǵy fılıalynan aýa raıy týraly suratyp jatyrmyz. Balyq ınspektsııasy oqıǵa ornyna shyqty, Aýyl sharýashylyǵy basqarmasyndaǵy mal dárigerleri birlesip, saraptama jasaıdy. Barlyǵy óz mamandaryn jiberdi. Biz Mańǵystaý oblysynyń tabıǵı resýrstar jáne tabıǵat paıdalanýdy retteý basqarmasynyń ókilderimen birge óz mamandarymyzdy da jiberdik. Onda baryp kelgennen keıin shuǵyl túrde taldaý jasalady. Ázirge jumys toby qurylǵan joq. Bizden shyqqan zerthana sýdyń synamasyn alady. Balyq ınspektsııasy ıtbalyqty tekseredi. Naqty qorytyndyny búgin shyǵaryp, jarııalaımyz», - degen bolatyn Mańǵystaý oblysy boıynsha Ekologııa departamenti basshysynyń orynbasary, Mańǵystaý oblysy boıynsha bas memlekettik ınspektor Baýyrjan Ámirbekov.
Aıta keteıik, 18 qyrkúıek kúni jergilikti BAQ-ta Internet qoldanýshylar Fort-Shevchenko qalasy mańyndaǵy Kaspıı teńizi jaǵalaýynan 4 ıtbalyqtyń ólip jatqanyn habarlaǵan.
