Kaspıı jaǵalaýyndaǵy 7 gektar jerde qamys órti áli sóngen joq

ATYRAÝ. QazAqparat – Atyraý oblysynda Kaspıı teńiziniń jaǵalaýyndaǵy qamys órtin sóndirýge tikushaqpen 66 márte sý shashyldy. Áli 7 gektar jerde qamys órti sóngen joq, dep habarlaıdy QazAqparat.

Oblystyq tótenshe jaǵdaılar departamentiniń qoǵammen baılanys tobynan málim etkendeı, 21 qyrkúıekte teńiz jaǵalaýyndaǵy qamys órtin sóndirýge tikushaq tartyldy.

«Qamys órti 14 qyrkúıekte jergilikti ýaqytpen 20:40 shamasynda bastaldy. Teńiz jaǵalaýyndaǵy batpaqqa baılanysty órti sóndirý múmkin bolmady. Sol sebepten, «QazAvıaQutqarý» AQ-nyń MI-8 VSÝ-5 tikushaǵymen áýeden sý shashýǵa sheshim qabyldandy. Qamys órtine 21 qyrkúıekte kúndiz tikushaqtyń sý shashý qurylǵysymen áýeden 33 márte sý tógildi. Sonyń nátıjesinde qamys órtiniń bir oshaǵy, shamamen 400 sharshy metr aýmaqtaǵy jalyn sóndirildi. Al, keshke deıin áýeden 66 ret sý shashylyp, 3 gektardaǵy órt joıyldy», -dep habarlady departamenttiń qoǵammen baılanys toby.

Sý tikushaqpen qamys órtiniń oshaǵynan 1,5-2 shaqyrym qashyqtyqta ornalasqan kólden alynyp jatyr.

Oblystyq tótenshe jaǵdaılar departamentiniń 33 qyzmetkeri 7 tehnıkamen 2 gektar aýmaqtaǵy qamys órtin sóndirgen. Jaǵalaýdaǵy 7 gektarda qamys órti áli sóndirilgen joq.

Kaspıı teńiziniń jaǵalaýyndaǵy meteorologııalyq jaǵdaıǵa toqtalsaq, jel ońtústik-shyǵystan soǵyp tur. Jel ekpini – 5-10 metr/sekýnd, al, aýa temperatýrasy + 34⁰S.

Eske sala ketelik, budan buryn Kaspıı jaǵalaýyndaǵy qamys órtin sóndirýge tikushaq tartylǵanyn habarlaǵan bolatynbyz.