Kaspıı jaǵalaýynda janǵan qamys tútini Atyraýdy basyp qaldy
Atyraý qalasyn tútin tumashalap tur. Turǵyndar jelide shaǵym aıtyp jatyr.
Oblystyq tótenshe jaǵdaılar departamentiniń qoǵammen baılanys tobynan málim etkendeı, Kaspıı teńiziniń jaǵalaýynda qamys órtengen.
«Kaspıı teńiziniń jaǵalaýyndaǵy «Aqjaıyq memlekettik tabıǵı rezervatynyń aýmaǵynda qamys janyp jatyr. Bul – Atyraý qalasynyń mańyndaǵy Damby aýylynan 30 shaqyrym qashyqtyqtaǵy aýmaq. Búgin, 2 sáýirde jergilikti ýaqytpen saǵat 19:00 shamasynda qamys órti shamamen 85 gektar aýmaqty sharpydy. Tótenshe jaǵdaılar jáne «Aqjaıyq» memlekettik tabıǵı rezervatynyń qyzmetkerleri 80 gektar aýmaqtaǵy órtti sóndirdi. Jel ekpini órtti sóndirýge qıyndyq keltirip tur. Eldi mekenderge tónip turǵan qaýip joq», -dep habarlady departamenttiń qoǵammen baılanys tobynan.
Teńiz jaǵalaýyndaǵy 5 gektardaǵy qamys órtin sóndirýge tótenshe jaǵdaılar departamentinen 10 qyzmetker, 2 tehnıka, «Aqjaıyq» memlekettik tabıǵı rezervatynan 30 adam, 9 tehnıka, 2 qaıyq, 4 motopompa tartylǵan.
Eske sala ketelik, budan buryn Atyraý oblysynyń Reseımen shekarasyndaǵy Qıǵash ózeniniń jaǵalaýynda qamys órtengenin jazǵan bolatynbyz.
Keıin Atyraý turǵyndary aýadaǵy sasyq ıiske shaǵymdanyn habarlaǵan edik.
Aýadaǵy jaǵymsyz ıiske baılanysty ekologtar Atyraý aýasynda kúkirtti sýtek shekti normadan asyp ketkenin.
«Kvadrat» býlaný alańyn qalpyna keltirý jumystaryn júrgizip jatqan «Pavlodar ózen aılaǵy» AQ ókilderiniń qatysýymen atmosferalyq aýadan synama alyndy. «Kvadrat» býlaný alańynda júrgizilgen monıtorıngtiń nátıjesinde kúkirtti sýtek ıngredıentiniń ruqsat etilgen shekti shoǵyrlanýdan asý faktisi anyqtaldy», -dep habarlaǵan edi ekologııa departamentiniń baspasóz qyzmeti.