Kaspıı jaǵalaýynda týrızmdi damytýǵa 21 jer ýchaskesi zańsyz berilgen

AQTAÝ. QazAqparat – Kaspıı jaǵalaýynda týrızmdi damytýǵa arnalǵan 21 jer telimi negizsiz berilgen. Muny Mańǵystaý oblysy boıynsha Sybaılas jemqorlyqqa qarsy qyzmet departamenti monıtorıng barysynda anyqtap otyr, dep habarlaıdy QazAqparat tilshisi.

«Týrızmdi damytýǵa arnalǵan 21 jer telimi (43 ga) «keńeıtý maqsatynda» negizsiz berilgen. Máselen, 2021 jyly qala ákimdigi turǵynǵa demalys bazasyn salýǵa arnalǵan 10 sotyq jer telimin keńeıtý úshin irgeles jerden qosymsha 4,7 sotyq jerdi 3 jylǵa jalǵa bergen. Jer ýchaskesi osy kúnge deıin ıgerilmegen jáne memleketke qaıtarý úshin sotqa talap-aryz berildi», - dedi Mańǵystaý oblysy boıynsha Sybaılas jemqorlyqqa qarsy qyzmet departamenti basshysynyń mindetin ýaqytsha atqarýshy Shamýraıt Shamenov.

Sondaı-aq taǵy bir kásipker teńiz jaǵalaýynda qonaqúı qurylysyn salýǵa arnalǵan 1,5 gektar ýchaskesin keńeıtý úshin ákimdikten taǵy 1,4 gektar jer telimin jalǵa alǵan. Alaıda, ol jerdi ıgermesten basqa adamǵa satyp jibergen. Igerilmegen jerdi memleketke qaıtarý týraly sotqa talap-aryz berildi.

Aıta keteıik, jer qatynastary salasyna júrgizilgen monıtorıng sybaılas jemqorlyq táýekelderi kartasynyń negizinde jasaldy.

Foto: Mańǵystaý oblysy boıynsha Sybaılas jemqorlyqqa qarsy qyzmet departamenti