Kaspıı jaǵalaýynda qyzyl qasqyr vıdeoǵa túsip qaldy

FORT-ShEVChENKO. QazAqparat - Mańǵystaýlyq vıdeograftyń kamerasyna sırek kezdesetin jyrtqysh ań - qyzyl qasqyr túsip qaldy, dep habarlaıdy QazAqparat.

Óziniń aıtýynsha, Meırambek Aralbaıuly bul vıdeony keshe, 6 tamyz kúni Kaspıı jaǵalaýynan túsirip alǵan.

«Bıylǵy erekshe ystyq pen qýańshylyqtan ańdar jaǵaǵa shyǵyp qalǵan balyqty qorek etýge májbúr bolǵan sııaqty» dep atap ótti vıdeograf Instagram paraqshasynda.

Vıdeodan urǵashy qasqyrdyń tóbede aınalyp ushyp júrgen drondy kórip, qoryqqannan qasha jónelgenin kórýge bolady.

Meırambek Aralbaıuly qyzyl qasqyr beıqam tamaqtanyp alýy úshin vıdeotúsirilimdi osy jerden toqtatqan.

Qyzyl qasqyr - qasqyr tuqymdasyna jatatyn jyrtqysh sútqorekti. Qazaqstanda Tıan-Shan men Jońǵar Alataýynda kezdesedi. Terisi baǵaly, sany óte az ań sanalady.

Qyzyl qasqyr Halyqaralyq tabıǵat qorǵaý odaǵy men Qazaqstannyń «Qyzyl kitabyna» engizilgen.