Kaspıı jaǵalaýynda qamys órtimen kúres jalǵasyp jatyr

ATYRAÝ. QazAqparat – Atyraý oblysynda Kaspıı teńizi jaǵalaýyndaǵy qamys órtin sóndirý jalǵasyp jatyr, dep habarlaıdy QazAqparat Tótenshe jaǵdaılar mınıstrligine silteme jasap.

Atyraý oblysy Tótenshe jaǵdaılar departamentiniń kúshteri men quraldary, jergilikti atqarýshy organdardyń jáne «AqJaıyq» tabıǵı memlekettik rezervatynyń qyzmetkerleri 3 kún boıy Kaspıı teńizi jaǵalaýyndaǵy qamys órtimen kúres júrgizýde.

2 sáýirden bastap búginge deıin 80-nen astam gektar órt sóndirildi (jalyn sharpyǵan aýmaq 89,5 ga quraıdy).

«Aıta ketý kerek, órtti sóndirý jumystary aralas tásilmen júzege asyrylýda. Máselen, jergilikti jerdiń sýly-batpaqty bolýyna baılanysty órt sóndirý tehnıkasy órt oshaǵyna jete almaǵandyqtan, sóndirý jumystary jaıaý tártippen hlopýshkalardyń, aspaly órt sóndirgishterdiń kómegimen júrgizilip jatyr. Kólik joly bar basqa ýchaskelerde tıisti órt sóndirý tehnıkasy jumyldyryldy», - delingen málimette.

Buǵan deıin habarlaǵanymyzdaı, búgin, saǵat 17.00-den bastap órtti sóndirýge «Qazavıaqutqarý» AQ-nyń sý aǵyzý qurylǵysy bar MI-8 tikushaǵy jumyldyryldy.

«Qazirgi ýaqytta negizgi órt oshaqtaryna áýeden 14 ret, jalpy kólemi 70 tonna sý tógildi.

Sóndirilmegen aýmaq shamamen 4 ga quraıdy.

Qamys órtin sóndirýge barlyǵy 70-ten astam adam jáne 20-ǵa jýyq ártúrli tehnıka jumyldyryldy.

Oblys aýmaǵyndaǵy órt jaǵdaıynyń monıtorıngi erekshe baqylaýda.

Atyraý oblysy TJD azamattarǵa órt qaýipsizdigi qaǵıdalaryn saqtaýǵa keńes beredi», - delingen TJM usynǵan málimette.

Eske salaıyq, Atyraý oblysynyń ákimdigi «Aqjaıyq» rezervatyn óz balansyna berýdi surap otyr. Bul Kaspıı teńizi jaǵalaýyndaǵy qamys órtiniń aldyn alý jumystaryn retteýge múmkindik bermek.