Kaspıı jaǵalaýynda 7 kúnge sozylǵan qamys órti sóndirildi
Atyraý oblystyq tótenshe jaǵdaılar departamentiniń qoǵammen baılanys tobynan málim etkendeı, búgin, 13 shildede saǵat 16:00-de qamys órti sóndirilgen.
«Qazaqstan Ǵarysh sapary» UK» AQ-nyń ǵarysh monıtorıngine negizdelgen «Aqjaıyq» memlekettik tabıǵı rezervatynyń aqparatyna sáıkes, qamys órtiniń jalpy aýdany 910 ga bolǵan. Órt sóndirýshiler 7 kún boıy otpen arpalysty. Kúnniń aptap ystyǵy men aýmaqtyń sýly, batpaqty jerinde qalyń ósken qamys órtin tez sóndirýge kedergi keltirgen.
Kaspıı teńiziniń jaǵalaýyndaǵy qamys órti 6 shildede anyqtalǵan. Atyraý oblystyq tótenshe jaǵdaılar departamenti basshysynyń mindetin atqarýshy Asqat Erjanovtyń málimetinshe, qamys órti Atyraý qalasyndaǵy Keńózek aýyldyq okrýginen 30 shaqyrym qashyqtyqta tirkelgen.
«6 shildede saǵat 20:00 de órtti anyqtaý jáne baqylaý úshin №13 órt sóndirý bóliminen 4 qyzmetker, 1 tehnıka, №4 órt sóndirý bóliminen 1 qyzmetker, 1 tehnıka, jol talǵamaıtyn TREKOL kóligimen 7 qyzmetker jiberildi», - dep habarlady Asqat Erjanov.
Al, 7 shildede saǵat 21:00-degi málimetke sáıkes qamys ósimdikteriniń janý aýmaǵy 20 gektar boldy. Sol kúni Kaspıı jaǵalaýyndaǵy qamys órtin sóndirýge Qyzylordadan tikushaq tartýǵa sheshim qabyldanǵan.
«Teńiz jaǵalaýyndaǵy órt oshaqtaryn sóndirý úshin Qyzylorda qalasynan sý tógetin qurylǵysy bar MI-8 tikushaǵyn tartý josparlanyp otyr. Órt oshaǵynyń odan ári taraýyn boldyrmaý úshin aınalasyndaǵy jerdi jyrtýǵa soqasy bar K-700 traktory tartylady», - dep habarlady departamenttiń qoǵammen baılanys toby.
Tóteshelikter 9 shildede Kaspıı jaǵalaýyndaǵy qamys órtiniń aýmaǵy 830 gektarǵa jetkenin habarlady. Sol kúni oblys ákimi Serik Shápkenov tikushaqpen qamys órtine áýeden barlaý júrgizdi.
Oblys ákimi baspasóz qyzmetiniń málimetinshe, bıyl «Aqjaıyq» memlekettik tabıǵı rezervatyna arnaıy tehnıka satyp alýǵa respýblıkalyq bıýdjetten 285 mln teńge bólingen. Al, Atyraý oblysynyń tótenshe jaǵdaılar departamentine 30 tehnıka satyp alýǵa jergilikti bıýdjetten 1,5 mlrd teńge qaralǵan.
«Qamys órtin sóndirý úshin Atyraý oblystyq tótenshe jaǵdaılar departamenti men «Aqjaıyq» memlekettik tabıǵı rezervatynan 80 adam men 14 tehnıka, «Qazavıaqutqarý» AQ-nyń MI-8 tikushaǵy jumyldyryldy. Órt bastalǵannan beri tikushaqpen 167 ret 500 tonnadan astam sý tógildi», - dep habarlady departamenttiń qoǵammen baılanys tobynan.
