Kaspıı jaǵalaýynda 5 kún janǵan qamys órti sóndirildi
Atyraý oblystyq tótenshe jaǵdaılar departamenti qoǵammen baılanys tobynyń málimetinshe, qamys órti keshe, 6 sáýirde saǵat 21:30-da tolyq sóndirilgen.
«Qazaqstan ǵarysh sapary» kosmomonıtorınginiń qorytyndysyna sáıkes «Aqjaıyq» memlekettik tabıǵı rezervaty aýmaǵyndaǵy órttiń jalpy aýdany 1 200 gektardy quraǵan.
«Kaspıı jaǵalaýyndaǵy batpaqty, sýly jerde 2 sáýirde qamys órti tutandy. Bul – Atyraý qalasynan 30 shaqyrym qashyqtaǵy aýmaq. Jalynnan flora men faýna zardap shekken joq. Óıtkeni qustardyń uıa salý kezeńi áli bastalmaǵan» dep habarlady departamenttiń qoǵammen baılanys toby.
Qamys órtin sóndirýge 5 kún boıy departamentten 42 qyzmetker, 7 tehnıka, «Aqjaıyq» memlekettik tabıǵı rezervatynan 30 adam, 9 tehnıka, 2 qaıyq, 4 motopompa jumyldyrylǵan.
Al, «Qazavıaqutqarý» AQ-nyń MI-8 tikushaǵynan STQ-5 qurylǵysymen 260-qa jýyq tonna sý tógilgen.
Eske sala ketelik, budan buryn Kaspıı jaǵalaýynda janǵan qamys tútini Atyraýdy basyp qalǵanyn jazǵan edik.
Keıin Atyraý oblysyndaǵy qamys órtin sóndirýge tikushaq tartylatynyn jazǵan bolatynbyz.
Al, Atyraý oblysynyń ákimdigi «Aqjaıyq» rezervatyn óz balansyna berýdi suraǵan edi.
«Qazir «Aqjaıyq» memlekettik tabıǵı rezervatynyń aýmaǵy óte úlken. Bul – 115 myń 500 gektar. Rezervat Ekologııa jáne tabıǵı resýrstar mınıstrligine qaraıdy. Biz ony Atyraý oblysy ákimdiginiń teńgerimine alǵymyz keledi. Ákimdik balansyna Kaspıı teńiziniń Reseı Federatsııasyndaǵy Astrahan oblysynyń shekarasynan Mańǵystaý oblysynyń shekarasyna deıingi aralyqtaǵy aýmaǵynyń berilýin suradyq. Eger bul másele sheshilse, onda rezervatqa oblys bıýdjetinen qarjylandyrý qarastyrylady. Aldymen Kaspıı teńiziniń jaǵalaýyndaǵy rezervat aýmaǵynda balyq jáne ań aýlaýǵa tyıym salynady. Qamys órtiniń aldyn alý úshin beınebaqylaý jáne teplovızorlar ornatý josparlanyp otyr», - deıdi Jasulan Bısembıev.
