Kaspıı jaǵalaýynda 10 kún janǵan qamys órti sóndirildi
Budan buryn Atyraý oblysynda Kaspıı jaǵalaýyndaǵy batpaqta qamys janyp jatqanyn
jazǵan edik.
Oblystyq tótenshe jaǵdaılar departamenti baspasóz qyzmetiniń málimetinshe, qamys órti 5 qazanda Atyraý oblysynyń Qurmanǵazy aýdanyndaǵy Qurmanǵazy aýylynan 60 shaqyrym jerdegi Kaspıı teńiziniń jaǵalaýynda tutanǵan. Al, 7 qazanda qamys órtin sóndirý úshin sý shashatyn VSÝ-5 qurylǵysy bar «Mı-871» tikushaǵy tartyldy. Sondaı-aq, oblystyq tótenshe jaǵdaılar departamentiniń 18 qyzmetkeri men Qurmanǵazy aýdandyq bóliminen qutqarýshylar jumyldyryldy.
Keıin janý oshaǵyna jaqyn ornalasqan sý kózin izdeý maqsatynda «Qazavıaqutqarý» AQ batys óńirlik fılıalynyń «MI-871» tikushaǵy saǵat 12:12-de áýege kóterildi. Ekıpaj 5 shaqyrym qashyqta ornalasqan sý qoımasyn tapqan. «MI-871» tikushaǵynyń VSÝ-5 sý aǵyzý qurylǵysymen janý oshaqtaryna áýeden 30 tonna sý tógildi.
Oblystyq tótenshe jaǵdaılar departamentiniń baspasóz qyzmeti 11 qazanda jergilikti ýaqytpen saǵat 12:00-ge deıin jaǵalaýdaǵy qamys órtiniń eki frontaldy janý oshaǵy anyqtalǵanyn málim etti. Sol kúni Kaspıı jaǵalaýyndaǵy 550 gektar aýmaqta qamys janǵany anyqtaldy. Tikushaqtyń sý shashý qurylǵysymen 21 ret sý tógildi. Jalyndy sóndirý úshin tógilgen sýdyń mólsheri 63 tonnany quraǵan.
Keshe, 14 qazanda saǵat 17.30-da Kaspıı teńiziniń jaǵalaýynda qamys órti tolyǵymen joıyldy.
«Qamys órtinen zardap shekkender joq. Jaǵalaýdaǵy órt aýmaǵy 550 gektar aýmaqty qurady. Sý aǵyzý qurylǵysy bar tikushaqtyń kómegimen 35 gektarda janǵan jalyn sóndirildi. Jeke quramnyń kúshimen 272 gektardy sharpyǵan órt joıyldy. Al, 243 gektardyń órti ózdiginen sóndi. «Qazavıaqutqarý» AQ-nyń tikushaǵymen órt oshaǵyna 63 tonnadan astam sý tógildi» -dep málim departamenttiń baspasóz qyzmetinen.
Kaspıı teńiziniń jaǵalaýyndaǵy qamys órtin sóndirýge departamenttiń jeke quramynan 34 adam, 5 tehnıka, 4 motosorǵysh, 1 generator, 40 jeń, 1 úrlemeli shatyr, sondaı-aq, O.Kóshekov atyndaǵy Atyraý agrarlyq-tehnıkalyq kolledjiniń 1 John Deere-6135b traktory men 1 qyzmetkeri, «Qazavıaqutqarý» AQ-dan MI-871 tikushaǵy men 5 adam tartylǵan.
Qurmanǵazy aýdanynyń ákimdigi qamys órtin sóndirýshshilerge azyq-túlik ónimderi men janar-jaǵar maı jetkizýdi uıymdastyrǵan.