Kaspıı jaǵalaýynan ıtbalyqtardyń óleksesi tabyldy

ASTANA. QazAqparat - Mańǵystaý oblysynda ıtbalyqtardyń qyrylý deregi tirkeldi, dep habarlaıdy QR Ekologııa jáne tabıǵı resýrstar mınıstrliginiń baspasóz qyzmeti.

«2023 jylǵy 12 mamyr kúni saǵat 17:00 shamasynda Jaıyq-Kaspıı oblysaralyq basseındik balyq sharýashylyǵy ınspektsııasynyń Mańǵystaý oblysy boıynsha balyq ınspektsııasy basqarmasynyń qyzmetkerleri Túpqaraǵan aýdany Baýtıno aýyly mańyndaǵy Kaspıı teńizi jaǵalaýynda monıtorıng júrgizý barysynda birneshe ondaǵan ıtbalyqtar men balyqtardyń ushasy tabyldy» delingen habarlamada.

Osy oqıǵadan soń qoldanystaǵy ózara is-qımyl shemasyna sáıkes jumys tobynyń barlyq músheleri (jergilikti atqarýshy organdar, mamandandyrylǵan ǵylymı uıymdar, Kaspıı ıtbalyǵyn zertteý jáne ońaltý ortalyǵy, gıdrobıologııa jáne ekologııa ınstıtýty, qazaqstandyq Qoldanbaly Ekologııa Agenttigi, Mıkrobıologııa jáne vırýsologııa ǵylymı-óndiristik ortalyǵy, oblystyń veterınarııalyq qyzmeti, ekologııa jáne polıtsııa departamentteri, tabıǵat qorǵaý prokýratýrasy) jedel túrde habardar etildi.