Kaspıı jaǵalaýynan 130-dan astam ıtbalyqtyń óleksesi tabyldy

AQTAÝ. QazAqparat – Mańǵystaý oblysynda Kaspıı jaǵalaýynan 130-dan astam ıtbalyqtyń ushasy tabyldy. Bul týraly QR Ekologııa, geologııa jáne tabıǵı resýrstar mınıstrliginiń Balyq sharýashylyǵy komıtetinen málim etti, dep habarlaıdy QazAqparat tilshisi.

Mańǵystaý oblysy boıynsha balyq ınspektsııasy basqarmasynyń Jaıyq-Kaspıı oblysaralyq basseındik balyq sharýashylyǵy ınspektsııasynyń qyzmetkerleri Kaspıı jaǵalaýynan 130-dan astam ıtbalyqtyń ushalaryn tapty.

8 qarasha kúni Jaıyq-Kaspıı oblysaralyq basseındik balyq sharýashylyǵy ınspektsııasynyń basshysy, Túpqaraǵan aýdany jergilikti atqarýshy organdary, polıtsııa bólimi, aýyl sharýashylyǵy bólimi, Gıdrobıologııa jáne ekologııa ınstıtýty, Mańǵystaý oblysynyń Ekologııa departamenti, Mańǵystaý oblysynyń aýmaqtyq veterınarııalyq baqylaý jáne qadaǵalaý bólimsheleri, Kaspıı ıtbalyǵyn zertteý jáne ońaltý ortalyǵy ókilderinen quralǵan komıssııa ólgen ıtbalyqtar anyqtalǵan Túpqaraǵan aýdanyna barǵan.

«Qazirgi ýaqytta ǵylymı ınstıtýttar men uıymdardyń, sondaı-aq veterınarııa bóliminiń qyzmetkerleri gıdrobıologııalyq, gıdrohımııalyq taldaýlar jasaý úshin janýarlar ólgen jerde sý men topyraqtan synama aldy, sondaı-aq gıstologııalyq jáne toksıkologııalyq zerthanalyq zertteýler júrgizýge tinder, onyń ishinde ishki aǵzalar alyndy», - delingen málimette.

Kaspıı ıtbalyqtarynyń qyrylý faktisi Mańǵystaý oblysy Túpqaraǵan aýdanynyń polıtsııa bóliminde 2022 jylǵy 7 qarashada tirkeldi.

Foto: gov.kz