Kaspıı jaǵalaýy týrızmine 360 mln dollardan astam ınvestıtsııa tartylady - Premer

MÁSKEÝ. QazAqparat – Kaspıı teńiziniń qazaqstandyq jaǵalaýynda qolaıly týrıstik klımat ornatýǵa 360 mln AQSh dollarynan astam ınvestıtsııa tartý josparlanyp otyr. Bul týraly QR Premer-Mınıstri Álıhan Smaıylov II Kaspıı ekonomıkalyq forýmynda sóılegen sózinde málim etti, dep habarlaıdy QazAqparat menshikti tilshisi.

Álıhan Smaıylov óńir elderin týrızm salasyndaǵy birlesken qadamdardy belsendi iske asyrýǵa shaqyrdy. Bul – aralas týrlardy iske qosý, krýızdik týrızmdi damytý jáne vızalyq-kóshi-qon rejımderin jolǵa qoıý jóninde sharalar qabyldaý.

«Qazaqstan úkimeti Kaspıı jaǵalaýynda qolaıly týrıstik klımat ornatý boıynsha sharalar qabyldap jatyr. 2025 jylǵa qaraı quny 360 mıllıon dollardan asatyn 15 ınvestıtsııalyq jobany júzege asyrý josparlanyp otyr», - dedi ol.

Premer-Mınıstr Kaspıı teńizi basseıni elderi arasynda tıisti kelisim daıyndaý – óńirlik týrızmdi damytýdyń sheshýshi qadamy bolǵanyn aıtty.

«Osy kelisimge tezirek qol qoıý jumysyn jedeldetýdi usynamyz», – dedi Á. Smaıylov.

Sondaı-aq, Premer-Mınıstrdiń aıtýynsha, aımaq elderiniń ózara árekettesýinde ekologııa máselesi de mańyzdy ról atqarady.

«Bizdiń elderimiz úshin ekologııalyq tepe-teńdikti saqtaý – eń mańyzdy mindet. Teńizdiń ekologııalyq problemalary onyń bıologııalyq resýrstarynyń sarqylýymen, shıkizatty óndirý jáne júkterdi tasymaldaý nátıjesinde aıtarlyqtaı lastaný qaýpimen baılanysty. Osy oraıda, Kaspıı ekologııalyq baǵdarlamasyn qaıta bastaýdy qoldaýǵa shaqyramyz», - dedi Álıhan Smaıylov.

Sonymen qatar, Úkimet basshysy teńizdiń bıologııalyq resýrstaryna zańsyz qol suǵýmen kúres salasyndaǵy áriptestik týraly ortaq hattama qabyldaý jumysyn da aıaqtaý qajettigin atap ótti.