Kaspıı jaǵalaýy týrıstik nysanǵa aınalady
AQTAÝ. QazAqparat - Aqtaý qalasynda Kaspıı teńiziniń jaǵalaýyndaǵy jartastar jaryqtandyrylyp, 2 shaqyrym jerge eki jaǵy qorshalǵan jol salynbaq. Buǵan qosa qala ákimi Ǵalymjan Nııazov 14-15 shaǵynaýdandaǵy teńiz jaǵalaýyna bıiktigi 11 metrlik 100 dana jasandy palma otyrǵyzýdy da usyndy, dep habarlaıdy QazAqparat tilshisi.
«Jartastaǵy soqpaq» jobasy aıasynda barlyq jaǵalaýdaǵy jartastar ár túrli tústi shamdarmen jaryqtandyrylady. 24 sholý alańy da salynady. Qaýipsizdikti qamtamasyz etý maqsatynda ár 30 metr saıyn beınebaqylaý qoıylmaq. Sondaı-aq, jasandy sarqyramany iske qosý josparlanyp otyr.
Jobanyń maqsaty - teńiz jaǵasyn tabıǵı murajaıǵa aınaldyrý. Aqtaýǵa týrısterdi tartý.
Joba aıasynda jartas qýysyna qazaq jazýlary men Mańǵystaý tastaryndaǵy tańbalar, aımaqtyń tarıhy týraly aqparattar qashap jazylmaq. Qurylys kezinde 20 jylǵa jaramdy aǵash polımerli materıaldy qoldaný kózdelip otyr. Joba avtorlarynyń aıtýynsha, bul óńirdiń tabıǵatyna, aýa-raıyna tózimdi bolmaq. Súrleý joldy salar kezde jartastarǵa zııan keltirilmeıdi.
1 mıllıard teńgege baǵalanǵan joba ınvestorlardyń qarjysyna júzege asyrylady. Jaǵalaýda demalyp, teńizdi jaqynnan kórýge múmkindik beretin uzyndyǵy 1450 metr soqpaq joldyń jobasyna mamyr aıynda memlekettik saraptama qorytyndysy beriledi.
Sondaı-aq, 15 shaǵynaýdannyń 10 úıinen bastap «Samal» shaǵynaýdanyna deıingi jaǵalaýdy abattandyrý jumystary bastaldy. Jobaǵa sáıkes 7,58632 ga aýmaqty kóriktendirý kózdelgen. Qurylystyń aýmaǵy 1329,0m². Teńiz jaǵalaýyn kórkeıtý Aqtaý qalalyq qurylys bólimi tapsyrysymen júrgizilmek. Jumysty mindetine alǵan kásipker 4 aıdyń ishinde bitirýge ýáde etti. Jaǵalaýdy kóriktendirý jumysy osy jyldyń qazan aıynda aıaqtalýy tıis.
Jalpy, teńiz jaǵasyn jaqsartý úshin 100 mln teńge qarajat bóliný kerek. Qarajat bólinse, 7 shaǵynaýdandaǵy teńiz jaǵasyn da abattandyrý qolǵa alynbaq. Munda jaǵajaıǵa qajet jabdyqtar men jumsaq kópirler qoıý josparlanyp otyr. Bul týraly Aqtaý qalalyq turǵyn-úı kommýnaldyq sharýashylyǵynyń basshysy Berik Іzǵalıev málim etti.
Berik Іzǵalıevtiń aıtýynsha, osy shaǵynaýdandaǵy jaǵajaıǵa Túpqaraǵan aýdanynan qum ákelip, tóselinedi.
Al, qala ákimi Ǵalymjan Nııazov usynǵan joba boıynsha 14-15 shaǵynaýdandaǵy teńiz jaǵalaýyna bıiktigi 11 metrlik 100 dana jasandy palma otyrǵyzý josparlanyp otyr. Oǵan 375,4 mln teńge qarajat bólinedi. Aglaı materıaly qoldanylady.
