Kaspıı jaǵalaýy 5 kúnnen beri órtenip jatyr
ATYRAÝ. QazAqparat – Atyraý oblysynda bes táýlikten beri qamys órtenip jatyr, dep habarlaıdy QazAqparat tilshisi Tótenshe jaǵdaılar mınıstrliginiń baspasóz qyzmetine silteme jasap.
Qazirgi ýaqytta órtený oshaqtaryn joıý boıynsha kúsheıtilgen sharalar júrgizilýde. Tútinge qaramastan, eldi mekenderge qaýip joq.
«15 qazanda tańerteńnen beri órtti joıýǵa «Qazavıaqutqarý» AQ-nyń MI-171 tikushaǵy jumyldyryldy. Eki kún ishinde tikushaq 66 tonna kóleminde 22 ret sý shashty. Sonymen qatar, oblystyq TJD-nyń jeke quramynan 55 adam jumyldyryldy. Órtti sóndirý batpaqty jermen jáne ósimdikterdiń qalyń ósýimen ýshyqty, osyǵan baılanysty tehnıkanyń barýy qıyndady. Órtti sóndirý aspaly órt sóndirgishter men shartyldaqtardyń kómegimen júzege asyrylýda.
Búgingi kúni órtengen jerdiń jalpy aýdany 1,5 gektardy quraıdy, onyń 1,2 gektary sóndirildi. Shamamen 0,3 gektar jerde órtti sóndirý jumystary jalǵasýda. Qazirgi ýaqytta órt teńizge jyljyp barady», - delingen habarlamada.
«Qazavıaqutqarý» AQ «MI-171» tikushaǵy áýeden janý oshaqtaryn sóndirý úshin sý shashý qurylǵysy kómegimen 15 ret sý shashty. Keshke 1 ga alańda birinshi janý oshaǵy sóndirildi, 0,8 ga alańda ekinshi janý oshaǵy sóndirildi.
Oqıǵa ornynda órtti sóndirý jáne baılanysty uıymdastyrý úshin komandalyq-shtabtyq mashına ornatyldy.
Jumyldyrylǵan jeke quram úshin qaýipsiz qashyqtyqta tamaqtanýǵa jáne túneýge arnalǵan shatyrlar tigildi.
Eske salsaq, Kaspıı jaǵalaýyndaǵy órt «Aqjaıyq» tabıǵı rezervatynyń aýmaǵyna taraǵandyǵy týraly habarlaǵan edik.
