Kaspıı jaǵalaýyndaǵy jartasta ne salynyp jatyr
AQTAÝ. KAZINFORM — Kaspıı jaǵalaýyndaǵy Jartasty soqpaq aýmaǵynda júrgizilip jatqan jumys turǵyndar arasynda túrli boljam týǵyzdy. Áleýmettik jelide bul jerde kommertsııalyq nysan salynyp jatyr degen pikirler taraǵannan keıin Aqtaý ákimdigi resmı túsinikteme berdi.
Ákimdiktiń málimetinshe, 4A shaǵynaýdanyndaǵy Jartasty soqpaqta ornalasqan úńgirde eshqandaı kommertsııalyq qurylys júrgizilip jatqan joq.
— Qazirgi ýaqytta munda ınjenerlik izdestirý jáne jóndeý jumystary júrgizilip jatyr. Osyǵan baılanysty úńgirge kirý ýaqytsha shekteldi. Bul shara turǵyndar men qala qonaqtarynyń qaýipsizdigin qamtamasyz etý maqsatynda qabyldandy. Jumys júrgizilip jatqan kezeńde úńgirdiń jekelegen bólikteriniń opyrylyp qulaý qaýpi jáne kelýshilerdiń ómiri men densaýlyǵyna qaýip tóndiretin ózge de faktorlar bar, — dep habarlady qala ákimdigi.
Osyǵan baılanysty aýmaqqa qorǵanys qorshaýlary, aqparattyq taqtaıshalar men eskertý belgileri ornatylǵan. Ákimdiktiń málimetinshe, úńgirdiń qazirgi jaı-kúıi qosymsha keshendi zertteýdi qajet etedi.
— Saraptamalyq tekserý nátıjesine sáıkes, ony saqtaý jáne kelýshiler úshin qaýipsiz qoljetimdilikti qamtamasyz etý máselesi boıynsha sheshim qabyldanady, — delingen resmı habarlamada.
Aqtaý ákimdigi turǵyndar men qala qonaqtaryn ýaqytsha shekteýlerge túsinistikpen qarap, qaýipsizdik talaptaryn saqtaýǵa shaqyrdy.
Buǵan deıin Túpqaraǵan aýdanyndaǵy Qapam ata jartasty meshitiniń kireberisine ornatylǵan plastık tereze men esik alynyp, tarıhı nysannyń bastapqy kelbeti qalpyna keltirilgenin jazǵan edik.
