Kaspıı jaǵalaýyndaǵy qamys órtine tikushaqpen 18 ret sý tógilgen

ATYRAÝ. KAZINFORM – Atyraý oblysyndaǵy Janbaı aýylynan 20 shaqyrymdaǵy Kaspıı jaǵalaýynda qamys janyp jatyr. Jalyndy sóndirý úshin tikushaqpen 18 márte sý tógilgen.

Janbaı – Isataı aýdanyndaǵy aýyl. Munda 2021 jylǵy sanaq qorytyndysy boıynsha 3231 adam tirkelgen. Onyń ishinde 1652 er, 1579 áıel bar. 

Tótenshe jaǵdaılar mınıstrliginiń málimetinşe, Kaspıı teńiziniń jaǵalaýyna taıaý ornalasqan aýyldan 20 shaqyrym qashyqtyqta qamys órti tirkelgen. 

«Isataı aýdanynyń Janbaı aýylynan 20 shaqyrym qashyqtyqta Kaspıı teńiziniń jaǵalaýyndaǵy 7 gektar aýmaqta qamys tutandy. Órt oshaǵy batpaqta jerde bolǵandyqtan, oǵan jetý qıyn. Qamys órtin sóndirý úshin Tótenshe jaǵdaılar mınıstrligine qarasty «Qazavıaqutqarý» AQ-dan MI-8 tikushaǵy jumyldyryldy. Qazirge deıin 18 ret sý tógildi», -dep habarlady mınıstrliktiń baspasóz qyzmeti. 

Jalyndy sóndirýge Tótenshe jaǵdaılar mınıstrliginiń qyzmetkerleri de tartylǵan. Olar órtti jaıaý sóndirip júr. Eldi mekenderge tónip turǵan qaýip joq.

Eske sala ketelik, budan buryn Kaspıı teńiziniń jaǵalaýynda qamys órtenip jatqanyn habarlaǵan bolatynbyz.