Kaspıı jaǵalaýynda TJM qyzmetkerlerine arnalǵan elimizdegi alǵashqy demalys orny ashyldy
ASTANA. KAZINFORM – Aqtaý qalasynda Kaspıı teńiziniń jaǵalaýynda Tótenshe jaǵdaılar mınıstrliginiń qyzmetkerleri men olardyń otbasy múshelerine arnalǵan 112 Resort Aktau demalys ortalyǵynyń saltanatty ashylýy ótti.
Resmı ashylý rásimine Tótenshe jaǵdaılar mınıstri, general-leıtenant Shyńǵys Árinov, Aqtaý qalasynyń ákimi Ábilqaıyr Baıpaqov, departament basshylyǵy men ardagerler qatysty.
Joba mınıstr Shyńǵys Árinovtiń bastamasymen júzege asyrylyp, elimizde azamattyq qorǵaý organdarynyń qyzmetkerleri men olardyń otbasy múshelerine arnaıy arnalǵan alǵashqy vedomstvolyq demalys ortalyǵyna aınaldy. Joba aıasynda 45 zamanaýı kapsýlalyq úı ornatý kózdelgen.
Búginde jaıly turýǵa qajetti barlyq jaǵdaımen tolyq jabdyqtalǵan alǵashqy jeti kapsýlalyq úı ornatylyp, paıdalanýǵa berildi. Árbir kapsýlalyq úı bir otbasynyń demalýyna arnalǵan jáne qajetti turmystyq tehnıka men qural-jabdyqtarmen tolyq qamtamasyz etilgen.
Ortalyq aýmaǵynda jaıly ári qaýipsiz demalys úshin barlyq qajetti jaǵdaı jasalǵan. Munda baqylaý-ótkizý pýnkti, ákimshilik ǵımarat, meıramhana, balalar oıyn alańy, eki sýburqaq, pırs, teńiz sýy úzdiksiz aınalyp turatyn basseın jáne balalar basseıni, ashyq aspan astyndaǵy dýsh, barbekıý aımaǵy, kafe jáne avtoturaq ornalasqan.
Aýmaq abattandyrylǵan: asfalttalǵan kireberis joldar men jaıaý júrginshiler joldary salynǵan, syrtqy jaryqtandyrý ornatylǵan, kógaldandyrý jumystary júrgizilip, aǵashtar otyrǵyzylǵan. Demalys ortalyǵy qajetti ınjenerlik-kommýnıkatsııalyq ınfraqurylymmen tolyq qamtamasyz etilgen.
Іs-shara barysynda osy jobany júzege asyrýǵa belsendi qatysqan qutqarýshylar, azamattar, jergilikti atqarýshy organdardyń ókilderi men kásipkerler TJM vedomstvolyq nagradalarymen marapattaldy.
112 Resort Aktau demalys ortalyǵyn qurý Qazaqstan TJM-niń áleýmettik saıasatynyń bir bóligi bolyp tabylady. Ol áleýmettik ınfraqurylymdy damytýǵa, jeke quramdy áleýmettik qoldaýdy nyǵaıtýǵa, sondaı-aq TJM qyzmetkerleri men olardyń otbasy músheleriniń demalýy men kúsh-qýatyn qalpyna keltirýine laıyqty jaǵdaı jasaýǵa baǵyttalǵan.
Demalýshylardyń qaýipsizdigin qamtamasyz etý úshin Mańǵystaý oblysy TJD Jedel-qutqarý jasaǵy men Apattar medıtsınasy ortalyǵy qyzmetkerlerine arnalǵan jeke úı salyndy. Olar munda táýlik boıy kezekshilik atqarady.
Mınıstrlik málimetinshe, resmı ashylǵannan keıin ortalyqtyń alǵashqy qonaqtary nysannyń qurylysy men abattandyrylýyna tikeleı qatysqan qutqarýshylar, órt sóndirýshiler jáne olardyń otbasy músheleri bolady. Olarǵa demalýǵa sertıfıkattar tabystaldy.
Shaǵyn kólemdi kemelerdi baqylaý TJM quzyryna ótkenin jazǵan edik.
