Kaspıı jaǵalaýynda 88 ıtbalyqtyń óleksesi tabyldy
AQTAÝ. KAZINFORM – Kaspıı jaǵalaýynan jappaı qyrylǵan ıtbalyq ólekseleri tabyldy. Bul týraly AShM Balyq sharýashylyǵy komıteti málim etti.
29 sáýirde Jaıyq-Kaspıı óńiraralyq balyq sharýashylyǵy basseındik ınspektsııasynyń qyzmetkerleri Mańǵystaý oblysy Túpqaraǵan aýdanynda Kaspıı teńizi jaǵalaýynda júrgizilgen monıtorıng barysynda jaǵalaýda jatqan 88 ıtbalyq óleksesin anyqtady. Tabylǵan jerine ınspektsııanyń, ákimdiktiń jáne Gıdrobıologııa jáne ekologııa ınstıtýtynyń ókilderi bardy.
Qyzyl kitapqa engen janýarlardyń qyrylǵany týraly fakt Mańǵystaý oblysy Túpqaraǵan aýdanynyń polıtsııa bóliminde sotqa deıingi tergep-tekserýdiń biryńǵaı tiziliminde tirkeldi.
«Qazgıdromet» RMK málimetinshe, ótken kezeńde oblys sýlarynda batystan soqqan jeldiń kúshi basym bolyp, ólgen ıtbalyqtardyń óleksesin jaǵaǵa shyǵaryp tastaǵan.
Ǵylymı uıymnyń (Gıdrobıologııa jáne ekologııa ınstıtýty) málimeti boıynsha janýar ólekseleriniń buzylyp, shirýge jaqyndaǵanyna baılanysty odan ári zerthanalyq zertteýler, sonyń ishinde toksıkologııalyq jáne patologııalyq taldaý úshin joǵary sapaly synama alýǵa múmkindik joq.
Mamandar ıtbalyqtar 2-3 apta buryn qyrylǵan dep boljaıdy. Osyǵan baılanysty sý janýarlarynyń óliminiń sebepterin anyqtaý qıynǵa soǵyp otyr.
Túpqaraǵan aýdandyq polıgonynda jergilikti atqarýshy organ men ınspektsııa sanıtarlyq normalardy saqtaı otyryp ólekselerdi jınaý, tasymaldaý jáne kádege jaratý jumystaryn júrgizdi. Kaspıı teńiziniń jaǵalaý syzyǵynyń monıtorıngi jalǵasyp jatyr.
Itbalyqtardyń qyrylýyna qatysty jaǵdaı Qazaqstan Respýblıkasy Aýyl sharýashylyǵy mınıstrligi Balyq sharýashylyǵy komıtetiniń baqylaýynda.
Buǵan deıin Mańǵystaý oblysynda ıtbalyqtar vırýstan qyrylǵan edi.