Kaspıı jaǵalaýynda 450 gektardy sharpyǵan qamys órti sóndirildi

ATYRAÝ. KAZINFORM – Atyraý oblysynda Kaspıı teńiziniń jaǵalaýynda qamys órtengen edi. Atyraý oblystyq tótenshe jaǵdaılar departamentiniń ımıdjdik jumys jáne syrtqy kommýnıkatsııalar tobynyń málimetinshe, Búgin túnde qamys órti sóndirilgenin habarlady.

Qamys órti 1 mamyrda keshki saǵat 18:30 shamasynda anyqtalǵan. Jalyn Atyraý qalasynyń mańyndaǵy Tasqala aýylynan 40 shaqyrym qashyqtyqta tutanǵan. 

Alaıda qamys ósken aýmaqty sharpyǵan jalyndy sóndirýge birneshe jaıt kedergi keltirgen.
Birinshiden, qatty jeldiń saldarynan órt shamamen 450 gektar aýmaqqa jaıylǵan.

Ekinshiden, qamys 2-2,5 metr bıiktikte ári qalyń ósken. Úshinshiden, jalyn batpaq pen sý bar aýmaqty sharpyǵan. Osyndaı sebepter órt sóndirýshiler men arnaıy kólikterdiń jalynǵa jaqyndaýyn qıyndatqan. 

– Búgin, 3 mamyrda saǵat 07:20-da Kaspıı teńiziniń jaǵalaýyndaǵy qamys órti tolyqtaı joıyldy. Tótenshe jaǵdaılar departamenti men «Aqjaıyq» memlekettik tabıǵı rezervatynyń qyzmetkerleri 75 gektar aýmaqtaǵy órtti sóndirdi. Al 400 gektar aýmaqtaǵy jalyn ózdiginen óshti. Jalyn sharpyǵan aýmaǵy shamamen 475 gektardy qurady, -dep málim etti departamenttiń ımıdjdik jumys jáne syrtqy kommýnıkatsııalar tobynan.

Órtti sóndirýge 101 adam, 21 tehnıka tartylǵan. Onyń ishinde tótenshe jaǵdaılar departamentinen 76 qyzmetker, 12 tehnıka, «Aqjaıyq» memlekettik tabıǵı rezervatynan 25 adam, 9 tehnıka bar.

Endi 15 qyzmetker táýlik boıy kezekshilik atqarady. Kezekshilikke 2 tehnıka bólingen.

Eske sala ketelik, buǵan deıin Atyraý oblysynda taǵy da qamys órtenip jatqanyn jazǵan bolatynbyz. 

Keıin qatty jeldiń saldarynan Kaspıı jaǵalaýyndaǵy qamys órtiniń aýmaǵy ulǵaıǵanyn  habarlaǵan edik.