Kaspıı jaǵalaýynan Qyzyl kitapqa engen birqazan óli kúıde tabyldy
AQTAÝ. KAZINFORM — Mańǵystaý oblysynda Kaspıı teńiziniń jaǵalaýynan birqazannyń óleksesi tabyldy. Aıta keteıik, atalǵan qus Qyzyl kitapqa engizilgen.
Bul týraly ekobelsendi, «Qazaq Balyk» Respýblıkalyq balyq sharýashylyǵy men akvakýltýra qaýymdastyǵynyń Mańǵystaý oblystyq fılıalynyń dırektory Danııar Ákimjanov habarlady.
— Keshe, 18 naýryzda, quzyrly organdarmen birge volonterler bolyp monıtorıngke shyqqan bolatynbyz. Monıtorıng barysynda Túpqaraǵan aýdany aýmaǵyndaǵy jaǵalaýdan birqazan (pelıkan) qusynyń óleksesi anyqtaldy. Atalǵan qus Qazaqstannyń Qyzyl kitabyna engizilgen. Oqıǵa boıynsha tıisti algorıtm saqtalyp, 102 nómirine habar berilip, derek resmı túrde tirkeldi, — deıdi Danııar Ákimjanov.
Buǵan deıin, Mańǵystaýda jaǵalaýdan ólgen aqqýlar tabylǵan bolatyn.
Al, sońǵy tórt jylda aımaqta 3 433 ıtbalyq qyryldy.
