Kaspıı jaǵalaýynan 300-ge jýyq ıtbalyqtyń óleksesi tabyldy
AQTAÝ. KAZINFORM — Mańǵystaýda 17 sáýirden beri 300-ge jýyq óli ıtbalyq tabyldy. Tek eki kúnniń ishinde ekobelsendiler Qarajanbas pen Bozashy ken oryndary mańyndaǵy Kaspıı teńizi jaǵalaýynan 37 ıtbalyqtyń óleksesin anyqtaǵan. Bul týraly «Qazaq Balyk» respýblıkalyq balyq sharýashylyǵy jáne akvamádenıet qaýymdastyǵy óńirlik fılıalynyń dırektory Danııar Ákimjanov habarlady.
Danııar Ákimjanovtyń aıtýynsha, 10 jáne 11 mamyr kúnderi ekobelsendiler Qarajanbas pen Bozashy mańyndaǵy teńiz jaǵalaýyn tekserip, óli ıtbalyqtardyń denelerin tapqan.
- Kólikpen jetý múmkin emes aýmaqtar bar. Men ózim mototsıklmen júrip, aýmaqty aralap shyqtym jáne óli denelerdi sanadym - eki kúnde 37 ıtbalyq tabyldy. Búgin Qaraqııa aýdanyndaǵy Toqmaq aýmaǵyndaǵy jaǵalaýdan taǵy 20 ıtbalyqtyń tabylǵany týraly aqparat keldi. Jalpy, 17 sáýirden beri shamamen 300 óli ıtbalyq tirkeldi, - deıdi Danııar Ákimjanov.
Ekobelsendiniń sózinshe, aqparat jedel túrde arnaıy algorıtm boıynsha ýákiletti organdar men aýdan ákimdigine jiberilip, ólekselerdi joıý jumystary uıymdastyrylady. Danııar Ákimjanov ıtbalyqtardyń qyrylýynyń negizgi sebebi retinde ekojúıedegi ózgeristerdi ataıdy.
- Biz, ekobelsendiler, jaǵalaýdyń tek shaǵyn bóligin ǵana baqylaı alamyz. Meniń oıymsha, ólgen ıtbalyqtardyń sany 300-den áldeqaıda kóp, - deıdi ol.
Buǵan deıin, Mańǵystaýda ıtbalyqtar qyrylyp jatqanyn jazǵan bolatynbyz
AShM Kaspıı jaǵalaýynda ıtbalyqtar men aqqýlardyń qyrylý sebebin atady.
