Kaspıı túbinde salynatyn talshyqty-optıkalyq baılanys jelisiniń qurylysy qashan aıaqtalady

ALMATY. KAZINFORM – Qazaqstan men Ázerbaıjannyń birlesken jobasy aıasynda Kaspıı teńiziniń túbine talshyqty-optıkalyq jeli tartylady. 

«Qazaqtelekom» akıtsonerlik qoǵamynyń ınnovatsııalar jónindegi bas dırektory Nurlan Meıirmanovtyń aıtýynsha, Kaspıı teńiziniń túbinde tartylatyn talshyqty-optıkalyq baılanys jelisiniń qurylysy 2026 jyldyń ekinshi jartyjyldyǵynda aıaqtalady.

— Bizde kelisimsharttyń árbir quramdas bóligi boıynsha naqty bekitilgen jospar bar. Negizgi kezeńder – teńizdi zertteýge qajetti ruqsattardy alý, kabeldik dızaındy retteý jáne ony óndirý. Biz bul mindetterdi bıyl aıaqtaýdy josparlap otyrmyz, - dep jaýap berdi ol jýrnalısterdiń suraǵyna.

Logıstıka kelesi jylǵa josparlanyp otyr.

— Kabeldi Qazaqstanǵa jetkizý – júktiń kólemi jaǵynan da, salmaǵy jaǵynan da kúrdeli protsess. Teńizge shyǵyp, tóseýdi bastaýǵa bári daıyn bolǵanda, jazda kabeldik júıeniń ózin ornalastyrýdy josparlap otyrmyz. Kelesi kezekte optıkalyq júıelerdi daıyndaý jáne arna ınfraqurylymyn iske qosý jumystaryn bastaımyz. 2026 jyldyń ekinshi jartyjyldyǵynda iske qosýǵa daıyn bolamyz, - dep atap ótti Nurlan Meıirmanov. 

Buǵan deıin «Qazaqtelekom» men «AzerTelecom» Transkaspıı jobasy boıynsha strategııalyq qujatqa qol qoıǵany týraly jazǵan edik. 

Tsıfrlyq ınfraqurylym jobasy aıasyndaǵy Transkaspıı talshyqty-optıkalyq baılanys jelisi tranzıttik qabiletti keńeıtip, jańa naryqtarǵa shyǵýǵa múmkindik beredi.