Kaspıı teńiziniń jaǵalaýyndaǵy qamys órti 1 myń gektarǵa jetti

ATYRAÝ. KAZINFORM – Kaspıı teńiziniń jaǵalaýyndaǵy qamys órti 1 myń gektarǵa jaıylǵan. Jaǵalaýdaǵy batpaqty aýmaqtaǵy 20 gektar qamys áli byqsyp jatyr.

Atyraý oblystyq tótenshe jaǵdaılar departamenti qoǵammen baılanys tobynyń málimetinshe, 2 naýryzda beri Kaspıı teńiziniń Qurmanǵazy aýdany aýmaǵyndaǵy jaǵalaýynda qamys órtengen. 

«Qurmanǵazy aýylynan 40 shaqyrym qashyqtyqta «Qurmanǵazy ormanshylyǵy» KMM aýmaǵynda 1000 gektar alańda qamystyń janǵany anyqtaldy. Qamys órtinen aýdannyń eldi mekenderine tónip turǵan qaýip joq», -dep habarlady departamenttiń qoǵammen baılanys toby.

Búgin, 4 naýryzda órt oshaǵyna barlaý júrgizý úshin «QazAvıaQutqarý» AQ-nyń MI-8 tikushaǵy áýege kóterilgen.

«Teńiz jaǵalaýynyń batpaqty aýmaǵyndaǵy 20 gektarda qamys byqsyp jatyr. Órtengen qamystyń 780 gektary ózdiginen sóndi. Al, Atyraý oblystyq tótenshe jaǵdaılar departamentiniń qyzmetkerleri 200 gektarda jalyndy sóndirdi. Jalyndy joıýǵa tótenshe jaǵdaılar departamentinen, «Qurmanǵazy ormanshylyǵy» KMM-dan 37 adam, 1 tehnıka, 4 motopompa, 3 motorly qaıyq jumyldyryldy», - dep málim etti departamenttiń qoǵammen baılanys tobynan.

Qamys órtin sóndirý áli jalǵasyp jatyr. Biraq, teńiz jaǵalaýdaǵy batpaq pen joldyń joqtyǵy jalyndy sóndirýge qıyndyq týdyryp otyr. .
Eske sala ketelik, budan buryn Kaspıı teńiziniń Reseımen shekaradaǵy jaǵalaýynda qamys órtenip jatqanyn jazǵan edik.

Keıin Kaspıı teńiziniń jaǵalaýynda 700 gektar qamys órtengenin habarlaǵan bolatynbyz.