Kaspıı teńiziniń jaǵalaýyndaǵy 3,4 myń gektar jer memleketke qaıtaryldy

AQTAÝ. KAZINFORM – Mańǵystaý oblysynyń prokýratýrasy Kaspıı teńiziniń jaǵalaýy boıyndaǵy 3,4 myń gektar jer ýchaskesin jeke tulǵaǵa zańsyz berý faktisin anyqtady.

Oblystyq prokýratýranyń málimeti boıynsha, Kenderli qumqaıyry dep atalatyn bul ýchaske shyǵanaqtyń ońtústik-shyǵystan soltústik-batysqa qaraı 23 shaqyrymǵa sozylatyn oblystyń basty kórikti jerleriniń biri.

Bastapqyda, 2007 jyly jer ýchaskesi «Mańǵystaýmunaıgaz» AQ-na saýyqtyrý keshenin salý úshin 3,1 mlrd teńgege satylyp, keıinnen «Gelıos» JShS-ne 3,3 mlrd teńgege qaıta satylǵany anyqtaldy.

Taldaýmen atalǵan jer ýchaskesi JAO-men QR Jer kodeksiniń talaptaryn buza otyryp, zańsyz berilgeni belgili boldy.

Atap aıtqanda, jer komıssııasynyń otyrysy ótkizilmegeni, sondaı-aq jer ýchaskesine jerge ornalastyrý jobasy bekitilmegeni anyqtaldy.

Osylaısha, jer ýchaskesin berýdiń jalpy tártibi buzyldy (Jer Kodeksiniń 43-baby).

Oblys prokýratýrasynyń qadaǵalaý aktisiniń negizinde ýákiletti organ satyp alý-satý sharttaryn jaramsyz dep taný týraly sotqa talap-aryz engizdi.

Ekonomıkalyq sottyń sheshimimen talap qoıýshynyń talaptary tolyq kólemde qanaǵattandyryldy (zańdy kúshine engen joq).

Búgingi kúnde jer ýchaskesiniń kadastrlyq quny 30 mlrd teńgeden asady.